धनगढी । नेपाल प्रेस युनियन सुदूरपश्चिम प्रदेशले फागुन २१ गते हुन गइरहेको प्रतिनिधि सभा निर्वाचनलाई लक्षित गर्दै धनगढीमा रणनीतिक अभियान सञ्चालन गरेको छ । नेपाली काँग्रेसका उम्मेदवारलाई विजयी गराउने उद्देश्यले युनियनले निर्वाह गर्नुपर्ने भूमिका, गतिविधि र आगामी कार्ययोजनाबारे विस्तृत छलफल गर्न उक्त अभियान आयोजना गरिएको हो ।
आइतबार धनगढीमा भएको कार्यक्रममा नेपाल प्रेस युनियन सुदूरपश्चिम प्रदेशका अध्यक्ष मनमोहन स्वाँरको अध्यक्षता रहेको थियो भने नेपाल प्रेस युनियनका केन्द्रीय अध्यक्ष शिव लम्साल प्रमुख अतिथिका रूपमा सहभागी रहेका थिए । कार्यक्रममा प्रदेश तथा जिल्लाका युनियनका पदाधिकारी र सदस्यहरूको उल्लेखनीय उपस्थिति रहेको थियो ।
कार्यक्रममा बोल्दै केन्द्रीय अध्यक्ष शिव लम्सालले लोकतन्त्र सुदृढीकरणमा प्रेस युनियनको भूमिका अझ जिम्मेवार र सक्रिय हुनुपर्ने आवश्यकता औँल्याए । उनले प्रतिनिधि सभा निर्वाचन मुलुकको राजनीतिक भविष्यसँग प्रत्यक्ष जोडिएको विषय भएकाले सचेत, तथ्यपरक र जिम्मेवार पत्रकारिता अपरिहार्य रहेको बताए । ‘निर्वाचनको समयमा गलत सूचना, अफवाह र भ्रम फैलाउने प्रयासहरू हुन सक्छन्, यस्ता गतिविधिको प्रतिरोध गर्दै सत्य र तथ्य जनतासम्म पु¥याउनु प्रेस युनियनको मुख्य दायित्व हो,’ लम्सालले भने ।
उनले नेपाली काँग्रेस लोकतान्त्रिक मूल्य र संविधानको रक्षाका लागि प्रतिबद्ध दल भएकाले काँग्रेसका उम्मेदवारलाई विजयी गराउन प्रेस युनियनले वैचारिक र नैतिक समर्थन जनाउनुपर्ने धारणा राखे । युनियनका सदस्यहरूले आफ्नो पेशागत मर्यादा कायम राख्दै लोकतन्त्र र संविधानको पक्षमा जनमत निर्माण गर्न योगदान पु¥याउनुपर्ने उनको भनाइ थियो ।
प्रदेश अध्यक्ष मनमोहन स्वाँरले सुदूरपश्चिम प्रदेशमा आगामी निर्वाचनलाई लक्षित गरी युनियनले चरणबद्ध अभियान सञ्चालन गर्ने जानकारी दिए । उनले पत्रकारहरू समाजका दर्पण भएकाले उनीहरूको कलम र आवाजले जनमत निर्माणमा ठूलो प्रभाव पार्ने बताए । ‘हामीले कुनै पनि किसिमको अतिरञ्जना नगरी यथार्थपरक समाचार सम्प्रेषण गर्दै लोकतान्त्रिक शक्तिहरूको पक्षमा वातावरण निर्माण गर्नुपर्छ,’ स्वाँरले भने ।
कार्यक्रममा सहभागी वक्ताहरूले निर्वाचनको समयमा प्रेस स्वतन्त्रता, पत्रकार सुरक्षा र व्यावसायिक मर्यादाको विषयमा समेत चर्चा गरेका थिए । उनीहरूले निर्वाचनका क्रममा पत्रकारमाथि हुने सम्भावित दबाब, धम्की वा अवरोधप्रति युनियन सजग रहनुपर्ने र आवश्यक परे संस्थागत रूपमा प्रतिवाद गर्नुपर्ने धारणा व्यक्त गरे ।

रणनीतिक अभियानअन्तर्गत स्थानीय तहसम्म पत्रकारहरूलाई संगठित गर्ने, निर्वाचन सम्बन्धी सचेतनामूलक सामग्री प्रकाशन तथा प्रसारण गर्ने, भ्रामक समाचारको खण्डन गर्ने र लोकतान्त्रिक मूल्य मान्यताको पक्षमा बहस सिर्जना गर्ने योजना बनाइएको जनाइएको छ । साथै सामाजिक सञ्जालको प्रभावकारी प्रयोग गर्दै युवामाझ सकारात्मक सन्देश प्रवाह गर्ने विषयमा पनि छलफल भएको थियो ।
सहभागीहरूले प्रतिनिधि सभा निर्वाचनलाई स्वच्छ, निष्पक्ष र भयमुक्त बनाउन आफ्नो–आफ्नो स्थानबाट योगदान पु¥याउने प्रतिबद्धता जनाएका थिए । नेपाल प्रेस युनियन सुदूरपश्चिम प्रदेशले आगामी दिनमा पनि यस्ता रणनीतिक तथा संगठनात्मक कार्यक्रमलाई निरन्तरता दिने जनाएको छ ।
उक्त अभियानले सुदूरपश्चिम प्रदेशमा पत्रकारहरूबीच एकता र समन्वय बढाउने विश्वास लिइएको छ भने निर्वाचनको समयमा जिम्मेवार पत्रकारितामार्फत लोकतान्त्रिक प्रक्रियालाई थप बलियो बनाउने अपेक्षा गरिएको छ ।