अछाम । फागुन २१ गते हुने प्रतिनिधि सभा सदस्य निर्वाचनका लागि नेकपा (एमाले) का उम्मेदवार दिपक साउँद ऋषिदह क्षेत्रबाट उत्साहित हुँदै फर्किएका छन् । घरदैलो कार्यक्रमका क्रममा ऋषिदहका जनसमुदायबाट प्राप्त अपेक्षाभन्दा बढी माया र समर्थनले आफू खुसी र भावुक बनेको साउँदले बताएका छन् ।

फागुन २५ गते साँझ ऋषिदह क्षेत्रमा प्रवेश गरेका साउँदले स्थानीयसँग प्रत्यक्ष भेटघाट गर्दै उनीहरूको दुःख, पीडा र अपेक्षालाई आत्मसात गरेका थिए । यस क्रममा स्थानीयले पटक–पटक निर्वाचित भएका नेताहरूले केवल झुटा आश्वासन मात्रै दिएको गुनासो राख्दै अब नेतृत्व परिवर्तन आवश्यक रहेको बताएका छन् ।

नयाँ अनुहार, जिल्लाप्रति योगदान

राजनीतिमा नयाँ अनुहार भए पनि साउँदले अछाम जिल्लाको शिक्षा, खेलकुद र सामाजिक क्षेत्रमा उल्लेखनीय योगदान दिएको स्थानीयको भनाइ छ । उनले विद्यालय भवन निर्माण, खेलकुद संरचना निर्माण, द्वन्द्व तथा भूकम्प पीडितलाई राहत वितरणलगायत विभिन्न सामाजिक कार्य गरेका छन्। यी कार्यहरूको मूल्यांकन गर्दै ऋषिदहवासीहरूले अबको नेतृत्व दिपक साउँदलाई दिनुपर्ने धारणा राखेका छन् ।
घरदैलोका क्रममा स्थानीयले सक्षम, विकासमुखी र जेन–जी पुस्ताको आवश्यकता बुझ्ने युवा नेतृत्व चाहिएको बताउँदै साउँदप्रति समर्थन जनाएका छन् । “अबको भोट युवा उम्मेदवार दिपक साउँदलाई” भन्ने आवाज गाउँ–बस्तीमा सुनिन थालेको छ ।

विकासका मुद्दामा प्रतिबद्धता

उम्मेदवार साउँदले अछामको विकासका लागि रोजगारी सिर्जना, शिक्षा, स्वास्थ्य र सडक पूर्वाधारलाई प्राथमिकतामा राखेर काम गर्ने प्रतिबद्धता जनाएका छन् । उनले जनतासँग प्रत्यक्ष संवादबाट आएका सुझावलाई नै आफ्नो कार्ययोजनाको आधार बनाउने बताएका छन् ।

बुढाको आशिर्वाद

ऋषिदह क्षेत्रका एमालेका खम्बा मानिने स्वर्गीय दलबहादुर बुढाका बुबा मनबिरे बुढाले उम्मेदवार साउँदलाई जितको शुभकामना तथा आशिर्वाद दिएका छन् । घरदैलोका क्रममा साउँद आशिर्वाद लिन बुढाको घर पुगेका थिए । उक्त अवसरमा बुढाले “अबको समय युवाको हो, जनअपेक्षित काम गर्न सक्ने नेतृत्व आवश्यक छ,” भन्दै साउँदलाई पूर्ण समर्थन जनाएका छन्। यसबारे रमित साउँदले जानकारी दिएका छन् ।

घरदैलो सँगै समस्या संकलन

चुनावी घरदैलो कार्यक्रमसँगै साउँदले जनताका समस्या संकलन गरिरहेका छन् । कुन ठाउँमा के समस्या छ भनेर डायरीमा टिप्दै उनले खानेपानी, बाटोघाटो तथा सडक सञ्जालसम्बन्धी समस्या संकलन गरेका छन् ।
निर्वाचित भए पनि नभए पनि जनताका समस्या समाधानका लागि सधैं सक्रिय रहने प्रतिबद्धता उनले जनाएका छन् ।