धनगढी । किसान बहुउद्देश्यीय सहकारी संस्था लिमिटेड सहजपुर शाखाले मृतक शेयर सदस्यका परिवारलाई सुविधा वितरण गरेको छ ।
आइतबार चुरे गाउँपालिका-६ बयलाका मृतक शेयर सदस्य रुपकली दर्लामीका परिवारलाई सुविधा बाफतको चेक हस्तान्तरण गरेको हो ।
सहकारीको सहजपुर शाखाले आयोजना गरेको श्रद्धाञ्जली सभा तथा सुविधा वितरण कार्यक्रममा चुरे गाउँपालिका उपाध्यक्ष धनादेवी थापाले मृतक रुपकलीका श्रीमान टेकबहादुर दर्लामीलाई ८ लाख ९९ हजार ७९२ रुपैयाँको चेक हस्तान्तरण गरेकि थिइन ।
सुविधा वितरण कार्यक्रममा बोल्दै उपाध्यक्ष थापाले सहकारीले मृतक शेयर सदस्यका परिवारलाई सुविधा उपलब्ध गराएकोमा धन्यवाद व्यक्त गरिन ।
किसान सहकारीले शेयर सदस्यलाई विभिन्न सेवा सुविधा दिँदै आएको बताउँदै सहकारीको जन्मदेखि मृत्यु सम्मको सुविधा दिने कार्यको प्रशंसा गरिन ।
कार्यक्रममा बोल्दै चुरे गाउँपालिका वडा नं ६ का वडाध्यक्ष प्रेमबहादुर साउदले आफ्ना शेयर सदस्यको दु:खको घडीमा किसान सहकारीको सुविधा वितरण गर्ने काम राम्रो भएको बताए ।
उनले किसान सहकारीले किसाननलाई माथि उठाउन लगानी गर्दै आएको बताउँदै सहकारीको सहयोगले सदस्यलाई थप मदत पुग्ने बताए ।
किसान बहुउद्देश्यीय सहकारी संस्था लिमिटेडका सुपारीवेक्षण विभाग प्रमुख प्रकाशकुमार जिसीले दु:खको क्षणमा पनि किसानले आफ्ना शेयर सदस्यलाई सहयोग गर्दै आएको बताए ।
उनले सदस्यले गरेको कारोबारको बोझ घरपरिवारमा नपरोस भन्ने हेतुले सुविधा दिने गरेको बताए ।
त्यस्तै उनले सहकारीले हाल वित्तीय,कृषि र मार्ट सेवा दिँदै आएको पनि जानकारी दिए ।
उनले २०५२ सालमा २५ जना शेयर सदस्यबाट सुरु भएको सहकारीमा आज ९४ हजार शेयर सदस्य पुगेको बताए ।
सहकारीको सहजपुर शाखा प्रमुख दिनेशराज न्यौपानेले सहकारीले सदस्यका दु:ख सुखमा मलम लगाउने काम गर्दै आएको बताए ।
उनले विभिन्न सुविधा दिँदै आएको बताउँदै शेयर सदस्यको जन्मदेखि मरोणोपरान्त सुविधा दिँदै आएको बताए ।
श्रद्धाञ्जली सभा तथा सुविधा वितरण कार्यक्रमको सहजीकरण सहजपुर शाखाका कर्मचारी प्रेमप्रसाद भण्डारीले गरेका थिए ।
