धनगढी । बेहेडाबाबा फाउण्डेसनको आयोजना तथा शैलेस्वरी इङ्गलिस बोर्डिङ स्कुल र फरबेष्ट माध्यमिक विद्यालयको सहयोगमा धनगढी उपमहानगरपालिका–९ स्थित त्रिबेणी घाटमा सरसफाई कार्यक्रम सम्पन्न गरिएको छ।
धनगढीका निर्वतमान मेयर नृपबहादुर बडको नेतृत्वमा सञ्चालन गरिएको उक्त अभियानमा स्थानीयवासी, विद्यार्थी तथा विभिन्न संघसंस्थाका प्रतिनिधिहरूको सहभागिता रहेको थियो।
आर्यघाट क्षेत्रमा बढ्दो फोहोरका कारण वातावरण प्रदूषित बन्दै गएको भन्दै सरसफाई अभियान थालिएको जनाइएको छ। अभियानका अगुवा बडले सार्वजनिक स्थलहरूलाई स्वच्छ राख्न प्रत्येक महिना नियमित रूपमा सरसफाई कार्यक्रम सञ्चालन गर्ने योजना रहेको जानकारी दिए।
बेहेडाबाबा फाउण्डेसनका अध्यक्ष पदमराज जोशीले सरसफाई अभियानमा धनगढीका नागरिक समाज तथा विभिन्न संस्थाहरूलाई सक्रिय रूपमा सहभागी हुन आह्वान गरे। उनले अभियान सफल बनाउन सहयोग गर्ने सबैप्रति धन्यवाद व्यक्त गरे। सरसफाई अभियानले त्रिबेणी घाट क्षेत्रलाई स्वच्छ र आकर्षक बनाउन सहयोग पुग्ने अपेक्षा गरिएको छ। आफ्नो क्षेत्रमा सरसफाई अभियान संचालन गरेकोले आयोजकलाई धनगढी वडा नम्बर ९का अध्यक्ष प्रेम भण्डारीले सबैलाई धन्यवाद समेत व्यक्त गरेका थिए ।
