धनगढी । नवजीवन सहकारी संस्था लिमिटेडका अध्यक्ष देवबहादुर बमले सहकारीले उत्पादनलाई जोडेर थुप्रै कामहरु गरिरहेको बताएका छन् । उनले नयाँ कार्यसमिति निर्वाचित भएर आइसकेपछि संस्थामा थुप्रै नमूनायोग्य काम भएको बताए ।
उनले भने ‘हामीले खाद्य गोदाम बनाएका छौँ । मिलघर बनाएका छौँ । प्लान्ट तयार गरेका छौँ । उत्पादन भएको चामल बजारीकरण गर्ने काम गरेका छौँ ।’ त्यस्तै उनले तोरीको तेल,मसुरोको दाल,पीठोलाई नवजीवन ग्रामको रुपमा मझगाउँमा स्थापना गर्न लागिएको बताए ।
उनले देशभरी सहकारीहरु डुबिरहेको अवस्थामा नवजीवनमा पनि केही धमिरा लागेको र त्यसलाई सुद्धिकरण गर्ने काम गरिएको बताए । जसअन्तरगत एउटा एक करोड ५५ लाख,अर्को ८० लाख र एकल महिलाको २१ लख ऋणबाट दुई लाख असुल गर्न सफल भइएको बताए ।
उनले भने ‘असुलीलाई तीब्र बनाएका छौँ । ठूलाठूला ऋणीलाई कालोसूचीमा राखेर असुली गरेका छौँ । जसले १० करोडको सम्पत्ति राखेर ५ करोड ऋण लिने १०औं वर्षसम्म व्याज पनि नदिने अवस्था थियो । त्यो प्रवृतिको अन्य गरेका छौँ ।’
उनले ४ वर्ष अगाडि सहकारीले ४ अर्बको कारोबार गरिरहेको बताउँदै हाल ७ अर्बको कारोबारमा पुगिएको बताए । उनले नयाँ कार्यसमिति आउनुअघि २७ हजार शेयर सदस्य रहेकोमा हाल ४० हजारबढी शेयर सदस्य पुगेको बताए ।
त्यस्तै उनले सुखड र अत्तरियामा आफ्नै जग्गा खरिद गरि भवन निर्माण गरिएको तथा प्रधान कार्यालय धनगढीको भवन पछाडि घर खरिद गरि भाडामा दिइएको बताए ।
त्यस्तै,सहकारीले आफ्ना शेयर सदस्यलाई जन्मदेखि मृत्युसम्म जोडेर काम गरिरहेको बताए । उनले भने ‘शेयर सदस्यलाई सुत्केर भत्ताबाफत ५ हजार,बिरामी हुँदा बढीमा ३५ हजार,अंग प्रत्यारोपण गर्दा एक लाखसम्म र मृत्युपछि अन्तिम दाहसंसकारका लागि २० हजार खर्च उपलब्ध गराउँदै आएका छौँ ।’ उनले अब सहकारी प्राधिकरणमा गइसकेको समेत बताए ।
