धनगढी। नयाँ वर्ष २०८३ को पूर्वसन्ध्यामा सुदूरपश्चिमको अस्थायी राजधानी धनगढीमा भव्य ब्याडमिन्टन प्रतियोगिता आयोजना हुने भएको छ।
‘स्वास्थ्यका लागि खेलकुद, राष्ट्रका लागि खेलकुद’ भन्ने मूल नाराका साथ ओम श्रीनगर स्पोर्ट्स क्लब, धनगढी-१ को आयोजनामा ‘ओपन बी लेभल तथा भेट्रान ४५+ श्रीनगर स्पोर्ट्स कप–२०८२’ सञ्चालन हुन लागेको हो।
खेलकुदको माध्यमबाट युवाहरूमा अनुशासन र स्वस्थ जीवनशैलीको प्रवर्द्धन गर्ने उद्देश्यले आयोजित यो प्रतियोगिता चैत २७ र २८ गते धनगढीस्थित कभर्ड हलमा सञ्चालन हुने आयोजक समितिले जनाएको छ।
प्रतियोगितालाई दुई मुख्य विधामा विभाजन गरिएको छ। आयोजकका अनुसार ‘बी लेभल’ तर्फको विजेताले नगद ४१,१११ रुपैयाँ सहित ट्रफी र प्रमाणपत्र प्राप्त गर्नेछन्। त्यस्तै, द्वितीय स्थान हासिल गर्नेले २१,१११ रुपैयाँ र दुईवटा तृतीय स्थान प्राप्त गर्ने टिमले जनही ५,१११ रुपैयाँ पुरस्कार पाउनेछन्।
दुवै विधाका लागि टिम दर्ता शुल्क २,००० रुपैयाँ तोकिएको छ।
प्रतियोगितामा सुदूरपश्चिम प्रदेश भित्रका खेलाडीहरूले मात्र सहभागिता जनाउन पाउनेछन्। सहभागी हुन चाहने टिमले २०८२ चैत्र २६ गते बेलुका ४ बजेभित्र आफ्नो नाम दर्ता गरािसक्नुपर्नेछ।
