धनगढी । सुदूरपश्चिम प्रदेशका मुख्यमन्त्री कमलबहादुर शाहले सञ्चार क्षेत्र कमजोर भए लोकतन्त्र कमजोर हुने बताएका छन् ।
सरकारले सरकारी सूचना सरकारी सञ्चार माध्यममा मात्रै प्रकाशन/ प्रशारण गर्न गरेको परिपत्र सच्याउन माग गर्दै नेपाल पत्रकार महासङ्घले सुरु गरेको दवावमूलक आन्दोलन अन्तर्गत शुक्रबार महासङ्घको सुदूरपश्चिम प्रदेश समिति र कैलाली शाखाले धनगढीमा आयोजना गरेको प्रदेशमा रहेका संसदीय दलका नेताहरुसँगको छलफलमा बोल्दै उनले यस्तो बताएका हुन् ।
सरकाले जारी गरेको परिपत्रले निजी सञ्चार क्षेत्रमा तरङ्ग ल्याएको बताउँदै उनले सरकारले सञ्चार माध्यमलाई विभद गरेर पत्रकारिता क्षेत्र जोगाउने आधारलाई ड्यामेज गर्न खोजिएको बताए । उनले यसलाई समाधान गर्न सरकारले केही न केही नीति ल्याउनेमा आफू विश्वस्त रहेको बताए ।
राज्यले नै चौथो अङ्गका रुपमा लिएको पत्रकारिताको संरक्षण र सम्वद्र्धन सरकारले गर्नुपर्नेमा उनले जोड दिए ।
उनले प्रदेश सरकार सधै आमसञ्चारको विकासको पक्षमा भएको बताउँदै सुदूरपश्चिम प्रदेशसभामा आम सञ्चार विधेयक टेबुल भएको विधेयक थप परिमार्जित र संशोधन गर्ने सम्बन्धमा प्रदेश सरकार स्पष्ट रहेको बताए ।
छलफलमा बोल्दै नेपाली कम्युनिष्ट पार्टी (नेकपा) सुदूरपश्चिम प्रदेश संसदीय दलका नेता खगराज भट्टले संघ सरकारले गरेको निर्णय प्रेसलाई कमजोर पार्ने भएको बताए । उनले कुनै पनि छलफल नगरि,लोकतान्त्रिक विधि र प्रकृया पालना नगरि आएको सो परिपत्र नेपाली जनताको अभिमत विरुद्ध भएको आरोप लगाए ।
उनले भने ‘सञ्चार क्षेत्रको संस्थागत विकास र समृद्धिका लागि हाम्रो पार्टी सदैव तयार छ । हाम्रो महासंघको आन्दोलनमा ऐक्यवद्धता छ । इतिहासका हरेक कालखण्डमा सञ्चार क्षेत्र भूमिका धेरै उच्च छ । सञ्चार क्षेत्रलाई कमजोर बनाइनु हुन्न ।’
त्यस्तै,नेपाल कम्युनिष्ट पार्टी (एमाले) सुदूरपश्चिम प्रदेश संसदीय दलका उपनेता सन्तोषकुमारी शर्माले जनताको अधिकार,लोकतन्त्र,गणतन्त्र, संघीयताका लागि सञ्चार क्षेत्रले भूमिको सह्रानीय रहेको बताइन् ।
उनले सरकारले निजी क्षेत्रका सञ्चार क्षेत्रलाई लगाएको बन्देज सान्दर्भिक नभएको बताउँदै महासंघको आन्दोलनमा ऐक्यवद्धता रहेको बताइन् ।
छलफलमा विभिन्न सञ्चार माध्यममा आवद्ध सञ्चारकर्मीहरुले सरकारले गरेको निर्णय अबिलम्ब सच्याउन माग गरेका थिए । त्यस्तै,प्रदेश तथा स्थानीय तहबाट प्रकाशित हुने सूचना तथा विज्ञापन स्थानीय सञ्चार माध्यमलाई दिनुपर्ने माग गरेका थिए ।
