चैनपुर । हेफर इन्टरनेसनल नेपाल र स्थानीय सरकारको साझेदारीमा बझाङमा सञ्चालित ‘आर्थिक समृद्धिका लागि साझेदारी’ कार्यक्रमअन्तर्गतका परियोजनाहरूको प्रगति समिक्षा, सिकाइ आदान-प्रदान तथा अन्तरक्रिया कार्यक्रम बिहीबार सदरमुकाम चैनपुरमा सम्पन्न भएको छ ।

हेफर इन्टरनेसनल नेपालले आयोजना गरेको कार्यक्रममा खप्तडछान्ना, मष्टा, छविसपाथीभेरा, सुर्मा गाउँपालिका र जयपृथ्वी नगरपालिकामा सञ्चालित गतिविधि तथा उपलब्धिबारे समिक्षा गरिएको थियो ।

कार्यक्रममा क्षेत्रीय कार्यालयका वरिष्ठ कार्यक्रम अधिकृत प्रकाशकुमार केसीले प्रस्तुत गरेको प्रतिवेदनअनुसार परियोजनाको कुल लागतको ७० प्रतिशत सम्बन्धित स्थानीय तह र ३० प्रतिशत हेफरको बजेटमा सञ्चालन भएको छ । यसबाट हालसम्म ४ हजार १ सय परिवार प्रत्यक्ष लाभान्वित भएका छन् ।

कृषि तथा पशुवस्तु मूल्य शृंखलाअन्तर्गत किसानले दुध, बाख्रा, तरकारी र कुखुराको व्यवसायबाट करिब १४ करोड रुपैयाँ आम्दानी गरेको जानकारी दिइएको थियो । परियोजना सञ्चालनपछि पाँचै पालिकामा किसान परिवारको वार्षिक आम्दानी वृद्धि भएको र कृषि तथा पशु विकासमा पालिकाहरूले उच्च प्राथमिकता दिन थालेको देखिएको छ ।

परियोजनाअन्तर्गत पाँचै पालिकामा १७५ वटा महिला समूह गठन भएका छन् । प्रत्येक पालिकामा एक-एक वटा सहकारी र संकलन केन्द्र निर्माण गरिएको प्रगतिशील युवा समाजका अध्यक्ष रमेश केसीले जानकारी दिए । यसले महिला किसानहरूको बचत गर्ने बानी, आत्मविश्वास र आयआर्जनमा सुधार ल्याएको छ ।

जयपृथ्वी नगरपालिका-१ की सुनिता जोशीले भनिन्, ‘हेफरबाट सीप तालिम, बाख्रा र तरकारीको बीउ पाएपछि गुजरामुखी जीवनशैलीबाट व्यवसायमुखी जीवनशैलीमा आएका छौं । समूहमा मासिक बचत गर्छौं, बाख्रा उपहार कार्यक्रम गर्छौं र आत्मनिर्भर बन्न थालेका छौं ।’

लाभग्राही पुष्पा गिरी, सुशीलादेवी बोहरा, सरस्वती सिंह र सविता बोहराले समूहमा आवद्ध भएपछि क्षमता र आत्मबल बढेको बताए । तर महिलाहरूले समूह तथा सहकारीबाट उत्पादन गरेको सामग्रीको बिक्री-वितरण र बजारीकरणमा समस्या रहेको गुनासो गरे ।

कार्यक्रममा बोल्दै जयपृथ्वी नगरपालिकाका प्रमुख चेतराज बजालले परियोजनाले साना किसान र विशेषगरी महिलाहरूको आयआर्जन तथा क्षमता विकासमा सहयोग पुगेको बताए । ‘यस कार्यक्रमको निरन्तरता र दिगोपनका लागि पालिकाले सोचिरहेका छौं,’ उनले भने।

आर्थिक वर्ष २०८२/८३ सम्म परियोजनामा करिब १४ करोड खर्च भइसकेको जानकारी दिइएको थियो । कार्यक्रम हेफर इन्टरनेसनल नेपालका सह-निर्देशक किशोर काफ्लेको अध्यक्षतामा भएको थियो । कार्यक्रममा जिल्ला समन्वय समितिका प्रमुख नरबहादुर बोहरा, छविसपाथीभेरा गाउँपालिका अध्यक्ष वसन्त चलाउने, खप्तडछान्ना गाउँपालिका उपाध्यक्ष विष्णु थापा लगायतको उपस्थिति रहेको थियो ।

सहभागीहरूले अबका दिनमा किसानले उत्पादन गरेको वस्तुको बजारीकरणमा पहल गर्न र कार्यक्रमलाई दिगो बनाउन जोड दिनुपर्ने सुझाव दिएका थिए ।