धनगढी । जिल्ला प्रहरी कार्यालय कैलालीका प्रमुख प्रहरी उपरीक्षक (एसपी) नरेन्द्र चन्द २०८३ साल कार्तिक महिनाको ‘पुलिस अफ द मन्थ’ बाट सम्मानित भएका छन् ।
सुदूरपश्चिम प्रदेश प्रहरी कार्यालय, धनगढीले उनलाई प्रशंसा पत्र प्रदान गर्दै सम्मान गरेको हो ।
प्रशंसा पत्रमा एसपी चन्दले संगठनले सुम्पिएको जिम्मेवारी व्यावसायिक, निष्ठावान् र कर्तव्यनिष्ठ भई पूरा गरेको उल्लेख छ । कैलालीमा योजनाबद्ध रूपमा प्रहरी परिचालन गरी अपराध अनुसन्धान, शान्ति सुरक्षा कायम राख्न तथा नागरिकमा सुरक्षाको अनुभूति दिलाउन खेलेको भूमिकाको कदरस्वरूप उनलाई सम्मान गरिएको प्रदेश प्रहरी कार्यालयले जनाएको छ ।
साथै, नागरिकस्तरमा नेपाल प्रहरीको गरिमा र विश्वसनीयता अभिवृद्धि गर्न पुर्याएको योगदानको उच्च मूल्याङ्कन गरिएको छ । सुदूरपश्चिम प्रदेश प्रहरी प्रमुख प्रहरी नायब महानिरीक्षक (डीआईजी) सानुराम भट्टराईद्वारा हस्ताक्षरित प्रशंसा पत्रमा आगामी दिनमा पनि अपराध नियन्त्रण, अनुसन्धान र शान्ति सुरक्षा व्यवस्थापनमा थप प्रभावकारी योगदान रहने विश्वास व्यक्त गरिएको छ ।



























