धनगढी । किसान बहुउद्देश्यीय सहकारी संस्था लिमिटेड सहजपुर शाखाले मृतक शेयर सदस्यका परिवारलाई सुविधा वितरण गरेको छ ।
मंगलबार चुरे गाउँपालिका-१ ग्वानीका मृतक शेयर सदस्य ठगनीदेवि क्षेडालका परिवारलाई सुविधा बाफतको चेक हस्तान्तरण गरेको हो ।
सहकारीको सहजपुर शाखाले आयोजना गरेको श्रद्धाञ्जली सभा तथा सुविधा वितरण कार्यक्रममा चुरे गाउँपालिका-१ का वडाअध्यक्ष डम्बरबहादुर सिंहले मृतक ठगनीकी बुहारी पार्वति साउदलाई ५ लाख ९० हजार ५८६ रुपैयाँको चेक हस्तान्तरण गरेका थिए ।
सुविधा वितरण कार्यक्रममा बोल्दै अध्यक्ष सिंहले सहकारीले मृतक शेयर सदस्यका परिवारलाई सुविधा उपलब्ध गराएकोमा धन्यवाद व्यक्त गरे ।
उनले किसान सहकारीले शेयर सदस्यलाई विभिन्न सेवा सुविधा दिँदै आएको बताउँदै सहकारीको जन्मदेखि मृत्युसम्मको सुविधा दिने कार्यको प्रशंसा गरे ।
उनले किसान सहकारीले किसानलाई माथि उठाउन लगानी गर्दै आएको बताउँदै सहकारीको सहयोगले सदस्यलाई थप मदत पुग्ने बताए ।
किसान बहुउद्देश्यीय सहकारी संस्था लिमिटेडका शाखाका प्रमुख दिनेशराज न्यौपानेले दु:खको क्षणमा पनि किसानले आफ्ना शेयर सदस्यलाई सहयोग गर्दै आएको बताए ।
उनले सदस्यले गरेको कारोबारको बोझ घरपरिवारमा नपरोस भन्ने हेतुले सुविधा दिने गरेको बताए ।
त्यस्तै उनले सहकारीले हाल वित्तीय,कृषि र मार्ट सेवा दिँदै आएको पनि जानकारी दिए ।
उनले २०५२ सालमा २५ जना शेयर सदस्यबाट सुरु भएको सहकारीमा आज ९४ हजार शेयर सदस्य पुगेको बताए । न्यौपानेले सहकारीले सदस्यका दु:ख सुखमा मलम लगाउने काम गर्दै आएको बताए ।
उनले विभिन्न सुविधा दिँदै आएको बताउँदै शेयर सदस्यको जन्मदेखि मरोणोपरान्त सुविधा दिँदै आएको बताए ।
श्रद्धाञ्जली सभा तथा सुविधा वितरण कार्यक्रमको सहजीकरण सहजपुर शाखाका कर्मचारी भरत कठायत गरेका थिए ।
