धनगढी । युवा,विद्यार्थी तथा विभिन्न सीमान्तकृत समुदायका सवालमा सरोकारवाला सबै जिम्मेवार बन्नुपर्नेमा जोड दिइएको छ ।

लोकतान्त्रिक सहभागिताका लागि नागरिक संलग्नता प्रवद्र्धन परियोजना अन्तरगत सञ्चार प्रतिष्ठान नेपाल र संयुक्त राष्ट्रसंघीय विकास कार्यक्रम (यूएनडीपी)को सहकार्यमा बुधबार धनगढीमा आयोजित वर्तमान परिवेशमा युवा,विद्यार्थी तथा विभिन्न सीमान्तकृत समुदायका मुख्य सवालहरुमाथि सरोकारवालाहरुसँग नीति सम्वाद कार्यक्रमका सहभागीले सरोकारवाला जिम्मेवार बन्नुपर्नेमा जोड दिएका हुन् ।

कार्यक्रममा बोल्दै सुदूरपश्चिम प्रदेशसभाको अर्थ विकास समितिका सभापति एवं पूर्वमन्त्री घनश्याम चौधरीले गरिब गरिबै रहने र धनी झन धनी बन्दै जाने हो भने देश विकास असम्भव रहेको बताए ।

उनले भने ‘सीमान्तकृत समुदायका धेरै समस्या छन् । त्यसमा सबै तहका सरकारको ध्यान जान आवश्यक छ । प्रदेश सरकारले पनि मुक्त कमैया,मुक्त हलिया,मुक्त कमलरीलगायतका समुदायका बारेमा काम गरेको छ । अझै धेरै काम गर्न बाँकी छ ।’

त्यस्तै,प्रदेशसभाको सामाजिक विकास समितिका सभापति धर्मराज पाठकले सीमान्तकृत समुदायका धेरै समस्या रहेको बताउँदै त्यसलाई सम्बोधन गर्न आफू प्रतिवद्ध रहेको बताए । उनले सीमान्तकृत समुदायका सवालहरु प्रदेश सरकारले नीति तथा कार्यक्रममा समेटेको बताउँदै सरकारले एक्लै मात्रै यी समस्या समाधान गर्न नसक्ने र सबैले एकजुट भएर लाग्नुपर्ने बताए ।

प्रदेशसभा सदस्य एवं पूर्वमन्त्री लक्ष्मी विकले सरकारका नीतिगत समस्याका कारण सीमान्तकृत समुदायलाई समस्या हुने गरेको बताइन् । उनले सरकारले दलित विद्यार्थीलाई कक्षा १२ सम्म निःशुल्क शिक्षा भनिएपनि कतिपय ठाउँका शुल्क तिर्न बाध्य भएको बताइन् । उनले त्यसको सरकारले तथ्यांक लिन आवश्यक भएको बताउँदै तथ्यांकमा आधारित रहेर काम गर्नुपर्ने बताइन् । उनले सरकारबाट सीमान्तकृत समुदायका लागि केही राम्रा काम पनि भएको बताइन् ।

नेकपा एमालेका प्रदेश सचिव रणबहादुर चन्दले राज्यले लक्षित वर्गसम्म सूचना पु¥याउन नसक्दा लक्षित वर्ग विभिन्न सुविधाबाट बञ्चित हुने गरेको बताए । उनले किसानलाई दिइने अनुदान पनि वास्तविक किसानसम्म नपुग्ने बताए ।

नेपाली कम्यनिस्ट पार्टी (नेकपा) का सुदूरपश्चिम प्रदेश समिति सदस्य गीता नेपालीले समाजमा अझै छुवाछूत जस्ता कुप्रथा कायमै रहेको बताउँदै यस्ता कुप्रथा हटाउन कानूनको प्रभावकारी कार्यान्वयन आवश्यक रहेको बताइन् ।

उनले दलित विद्यार्थीले मात्रै नभर कानुन बनाउने दलित सांसदले समेत कोठा पाउन समस्या भएको बताइन् । कार्यक्रममा उपस्थित विभन्न क्षेत्रका सहभागीहरुले अझै पनि मुक्त कमैया,मुक्त कमलरी,मुक्त हलियाको पुनःस्थापना हुन बाँकी रहेको बताउनँदै यसमा तीनै तहका सरकार गम्भीर बन्नुपर्नेमा जोड दिएका थिए । त्यस्तै,अपांगता भएका व्यक्ती,लैगिंक तथा यौनिक अल्पसंख्यक समुदायका पनि विभिन्न समस्याहरु रहेका सहभागिले बताएका थिए ।

सञ्चार प्रतिष्ठान नेपालका अध्यक्ष हेमकर्ण विकको अध्यक्षतामा भएको कार्यक्रमको सहजीकरण वरिष्ठ पत्रकार मनमोहन स्वारले गरेका थिए ।