धनगढी । प्रमुख प्रतिपक्षी दल नेपाली कम्युनिस्ट पार्टी (नेकपा) सुदूरपश्चिम प्रदेश संसदीय दलका नेता खगराज भट्टले सुदूरपश्चिम प्रदेश सरकारले अँधेरी रातमा थुप्रै अँधेरा हकर्तका बीच बजेट आगामी आवका लागि बजेट ल्याएको बताए ।
बजेटका सन्दर्भमा आफ्नो धारणा राख्न नेकपा संसदीय दलले आज धनगढीमा आयोजना गरेको पत्रकार सम्मेलनमा बोल्दै उनले सरकारले विभिन्न विधि र पद्धति मिचेर बजेट ल्याएको बताए ।
उनले भने ‘साझ ५ बजे ल्याउने भनिएकोे बजेट राति १२ बजे पु¥याइयो ।इतिहासमा पहिलोपल्ट थुप्रै बेथितिका समाचार सुनिसकेपछि यसप्रकारको बजेट बक्तव्य सुन्नुको अर्थ औचित्य छैन भनेर सबै विपक्षीहरुले बहिस्कार गरेको परिस्थित बजेट आएको छ ।’
विपक्षी दलहरुसँग कुनै समन्वय नगरी हचुवाको भरमा बजेट आएको बताउँदै उनले अहंकारी र स्वच्छाचारी बलमा बजेट ल्याइएको उनको आरोप छ । ल्याउने विधि प्रकृयादेखि निर्माण,वाचन प्रकृया,पिडीएफ सार्वजनिकसम्म आइपुग्दा सिंगो सुदूरपश्चिम लज्जित भएको बताए ।
उनले प्रदेशसभामा प्रदेश सरकारले प्रस्तुत गरेको आगामी आव २०८३÷८४ को बजेट कुनै पनि हालतमा पारित हुन नदिने बताए ।
उनले भने ‘प्रवृति र चिन्तनका विरुद्ध सशक्त रुपामा प्रतिवाद गर्नु,यो बजेटलाई सम्पूर्ण रुपमा अस्विकार गर्नु,यसलाई पारित हुनबाट रोक्नु,बजेटको अन्तरवस्तु जनताका बीचमा छर्लङ्ग ल्याउनु र यो प्रवृतिलाई निरुत्साहित गर्नका लागि सडक र सदनमा प्रस्तुत हुनु प्रमुख प्रतिपक्षी भूमिका रहन्छ । यो बजेट कुनै पनि हालतमा पारित हुन दिँदैनौँ ।’
