धनगढी । नेपाल पत्रकार महासंघ सुदूरपश्चिम प्रदेश समितिले प्रेस तथा अभिव्यक्ति स्वतन्त्रताको संवैधानिक अधिकार पूर्ण रूपमा कार्यान्वयन गर्न तीनै तहका सरकारको ध्यानाकर्षण गराउँदै ‘धनगढी घोषणापत्र’ जारी गरेको छ ।
महासंघको पाँचौं साधारणसभाले लोकतन्त्र, विधिको शासन र नागरिक अधिकारको संरक्षणका लागि प्रेस स्वतन्त्रताको प्रत्याभूति आवश्यक रहेको निष्कर्षसहित नौ बुँदे घोषणापत्र सार्वजनिक गरेको हो ।
घोषणापत्रमा संविधानले प्रेस तथा अभिव्यक्ति स्वतन्त्रताको सुनिश्चितता गरेको भए पनि सरकार र राजनीतिक दलहरूले त्यसको पूर्ण कार्यान्वयन नगरेको भन्दै चिन्ता व्यक्त गरिएको छ ।
महासंघले निजी सञ्चार माध्यमलाई निरुत्साहित गर्ने उद्देश्यले सरकारी विज्ञापन सरकारी सञ्चार माध्यममा मात्र प्रकाशन तथा प्रसारण गर्ने निर्णय स्वतन्त्र प्रेसमाथिको प्रहार भएको ठहर गर्दै उक्त निर्णय तत्काल फिर्ता लिन सरकारसँग माग गरेको छ।
त्यसैगरी सुदूरपश्चिम प्रदेश सरकारले प्रदेशसभामा पेश गरेको सञ्चार विधेयकप्रति विशेष चासो व्यक्त गर्दै प्रेसमैत्री प्रावधानसहित यथाशीघ्र पारित गर्न आग्रह गरिएको छ।
घोषणापत्रमा सूचना प्रविधिको विकाससँगै बढ्दै गएको गलत, भ्रामक तथा मिथ्या सूचनाले विश्वसनीय पत्रकारितामाथि चुनौती सिर्जना गरेको उल्लेख गर्दै पत्रकारहरूलाई आचारसंहिताको पूर्ण पालना, तथ्यपरक र जिम्मेवार पत्रकारितामार्फत नागरिकलाई सत्य, सन्तुलित तथा विश्वसनीय सूचना प्रवाह गर्न आह्वान गरिएको छ।
महासंघले सुदूरपश्चिम प्रदेश समिति तथा नौवटै जिल्ला शाखाको संस्थागत सुदृढीकरण, सञ्चार संस्थाको सबलीकरण, पत्रकारहरूको क्षमता अभिवृद्धि र पेशागत सुरक्षाका कार्यक्रम सञ्चालन गर्न तीनै तहका सरकारसँग विशेष आग्रह गरेको छ ।
साथै सूचनाको हकको पूर्ण कार्यान्वयन, श्रमजीवी पत्रकारहरूको पेशागत तथा आर्थिक सुरक्षाको प्रत्याभूति, महासंघको सदस्यता शुद्धीकरण तथा संस्थागत
सुदृढीकरणप्रति प्रतिबद्धता व्यक्त गरिएको छ ।
साधारणसभाले कार्यक्रम सफल बनाउन सहयोग पु¥याउने महासंघका केन्द्रीय समिति, पूर्व पदाधिकारी, जिल्ला अध्यक्ष, प्रदेश परिषद् सदस्य तथा सहयोगी निकायहरूलाई धन्यवाद ज्ञापन गरेको छ । साथै कार्यक्रममा सहभागी महासंघका केन्द्रीय उपाध्यक्ष नितु पण्डित तथा प्रमुख अतिथिका रूपमा उपस्थित नजिर मियाँ प्रति आभार व्यक्त गरिएको छ ।
सामाजिक संस तथा अग्रज पत्रकारहरु सम्मानीत
नेपाल पत्रकार महासंघ सुदूरपश्चिम प्रदेश समितिको पाँचौं साधारणसभाको अवसरमा पत्रकारिता, सामाजिक सेवा तथा संस्थागत योगदानका क्षेत्रमा महत्वपूर्ण भूमिका निर्वाह गर्ने विभिन्न व्यक्तित्व तथा संस्थाहरूलाई सम्मान गरेको छ ।
कार्यक्रममा अग्रज पत्रकारिता सम्मानबाट कञ्चनपुरका चित्रांग थापा, डडेल्धुराका डिआर पन्त, कैलालीका सिद्धराज भट्ट, बैतडीका लक्ष्मीदत्त पाण्डे, कैलालीका उमीद वागचन्द, कञ्चनपुरका हरिप्रसाद जोशी, खेम भण्डारी, कैलालीका यज्ञराज यात्री, कञ्चनपुरका वीरबहादुर चन्द, माधव धामी तथा कैलालीका मनमोहन स्वार सम्मानित भएका छन् ।
त्यसैगरी महासंघको संस्थागत विकास र नेतृत्वदायी भूमिकाको कदर गर्दै संस्थापक अध्यक्ष अर्जुन शाह तथा निवर्तमान अध्यक्ष योगेश रावललाई कदरपत्र प्रदान गरिएको छ।
सामाजिक सेवामार्फत समाजमा उल्लेखनीय योगदान पु¥याएको भन्दै धनगढीस्थित नजजीवन अस्पताल प्रालि, निसर्ग हस्पिटल प्रालि तथा चैतन्य पाठशालालाई सामाजिक सेवा सम्मान प्रदान गरिएको छ।
साधारण सभामा सुदूरपश्चिम प्रदेशका विभिन्न जिल्लाका पत्रकार, सञ्चारकर्मी, सामाजिक अगुवा तथा सरोकारवालाहरूको उल्लेखनीय सहभागिता रहेको थियो ।
