धनगढी । कैलालीको गोदावरी नगरपालिका-४ गाईमारेमा अतिक्रमण हटाउने क्रममा वनका कर्मचारीले टेम्पो धकेलेर भीरबाट खसालेको घटनामा पीडितलाई ५ लाख क्षतिपूर्ती दिने सहमति भएको छ ।
डिभिजन वन कार्यालयले अतिक्रमण हटाउने क्रममा जेठ २९ गते दिउँसो डिभिजन वन कार्यालयका कर्मचारीले गोदावरी-४ कि स्थानीय धनादेवी धामीको टेम्पो भीरबाट धकेलेर खसालेका थिए।
टेम्पो खसालेको भिडिओ सार्वजनिक भएपछि उद्योग, पर्यटन, वन तथा वातावरण मन्त्रालयले प्रदेश वन निर्देशक डा हेमराज विष्टको संयोजकत्वमा पाँच सदस्यीय छानबिन समिति गठन गरेको थियो।
समितिलाई घटनाको सत्यतथ्य छानबिन गरी सात दिनभित्र प्रतिवेदन पेश गर्न समय सीमा तोकिएको थियो। जसको म्याद बुधबार सकिँदै छ।
तर, त्यसपूर्व नै टेम्पो धनी धनादेवी धामीलाई ५ लाख क्षतिपूर्ती उपलब्ध गराउने सहमतिपछि विवाद समाधान भएको छानबिन समितिका संयोजक विष्टले जानकारी दिए।
पीडित धामीले भत्केका घर टहरा पुनर्निर्माण गरिदिनुपर्ने,आफूहरुलाई तत्काल होल्डिङ सेन्टरमा राख्ने व्यवस्था गर्नुपर्ने र १० लाख क्षतिपूर्ति उपलब्ध गराउनु पर्ने माग गर्दै आएकी थिइन्।
