धनगढी । सशस्त्र प्रहरी बल, नेपालका प्रहरी महानिरीक्षक (आईजीपी) नारायणदत्त पौडेलले कैलालीस्थित गौरीफन्टा सीमा नाकाको स्थलगत निरीक्षण गरेका छन् ।
सीमा सुरक्षा व्यवस्थापन, सीमावर्ती क्षेत्रका समस्या र सीमापार अपराधको अवस्थाबारे जानकारी लिन आईजीपी पौडेल गौरीफन्टा पुगेका हुन् ।
निरीक्षणका क्रममा पौडेलले सीमा क्षेत्रमा खटिएका सशस्त्र प्रहरीका अधिकारी तथा सुरक्षाकर्मीसँग सीमाको पछिल्लो अवस्था, सुरक्षा चुनौती र सीमापार आवतजावतका विषयमा जानकारी लिएका थिए ।
उनले सीमावर्ती नागरिकसँग प्रत्यक्ष भेटघाट गरी उनीहरूका गुनासा तथा समस्या समेत सुने । स्थानीयले सीमा क्षेत्रमा देखिएका समस्या, आवतजावतमा हुने कठिनाइ, सीमापार अपराध तथा सुरक्षासँग सम्बन्धित विषयमा गुनासा राखेका थिए ।
पौडेलले नागरिकका गुनासा र सीमामा देखिएका समस्यालाई प्राथमिकताका साथ सम्बोधन गर्न पहल गर्ने बताए ।
निरीक्षणका क्रममा महानिरीक्षक पौडेलले सीमा सुरक्षाको संवेदनशीलतालाई ध्यानमा राख्दै सशस्त्र प्रहरी सीमा क्षेत्रमा निरन्तर सक्रिय भएर खटिएको बताए ।
उनले सीमासम्बन्धी समस्या, अपराध नियन्त्रण तथा नागरिकको सुरक्षाका विषयमा आफूहरू आफैं स्थलगत रूपमा खटिएर अवस्थाको अध्ययन गरिरहेको जानकारी दिए ।
गौरीफन्टा नाकामा भारतीय सुरक्षा अधिकारीहरूले समेत आईजीपी पौडेललाई स्वागत गरेका थिए ।
एसएसबीका सेकेन्ड कमान्डेन्ट रुपेश मधुवान, ३९ बटालियन पलियाका डिप्टी कमान्डेन्ट जगजितबहादुर जैगवार र गौरीफन्टाका एसिस्टेन्ट कमान्डेन्ट रवि कुमार सामोता लगायतका अधिकारीले उनलाई स्वागत गरेका थिए ।
नेपाल–भारतको प्रमुख नाकामध्ये एक गौरीफन्टामा दैनिक ठूलो संख्यामा मानिसको आवतजावत हुने गर्छ । यस्तो अवस्थामा सीमा सुरक्षा, अवैध गतिविधि नियन्त्रण तथा दुई देशका सुरक्षा निकायबीचको समन्वयलाई थप प्रभावकारी बनाउने विषयमा निरीक्षणका क्रममा छलफल भएको छ ।
