धनगढी- कैलाली प्रतिनिधि सभा क्षेत्र नम्बर –२ मा यस पटक त्रिपक्षीय भिडन्त हुने देखिएको छ । कैलाली -२ मा सत्ता गठबन्धनबाट माओवादी केन्द्रका भगत बडूवाल एमालेबाट झपट रावल र नागरिक उन्मुक्तिबाट अरुण चौधरी उम्मेदवार रहेका छन् ।
२०४८, २०५१ र २०५६ सालको निर्वाचन जितेर कांग्रेसले ह्याट्रिक गरेको कैलाली क्षेत्र नम्बर २ मा २०७० र २०७४ को निर्वाचन एमालेले जितेको थियो ।
यस क्षेत्रमा कांग्रेसले पार्टीगतमात्रै ह्याट्रिक गरेन । उम्मेदवारका रूपमा राम जनम चौधरीले समेत ह्याट्रिक गरेका थिए ।
कांग्रेसले ह्याट्रिक गरेको क्षेत्रमा अहिले एमालेले ह्याट्रिक गर्ने योजना बनाएको छ ।

‘पाँच वर्षसम्म यहाँ मैले विकासका थुप्रै काम गरेको छु । अझ धेरै काम गर्न बाँकी नै छन् । त्यसको लागि जनताले मलाई पुनः निर्वाचित गराउनु हुनेछ भन्नेमा पूर्ण विश्वस्त छु’, एमाले उम्मेदवार रावलले भने, ‘राष्ट्र र राष्ट्रियताको लागि देशमा एमालेको सरकार आवश्यक छ भन्ने सबै नेपालीलाई थाहा छ । त्यसैले पनि हामीलाई विजयी गराउनु हुनेछ ।’
क्षेत्र नम्बर –२ मा बर्दगोरिया गाउँपालिका र लम्की चुहा नगरपालिकाको पुरै क्षेत्र पर्दछ । यस क्षेत्रमा मोहन्याल गाउँपालिकाको वडा नम्बर –५ बाहेकका सबै वडा र जानकी गाउँपालिकाको वडा नम्बर २, ५, ८ र ९ पर्छन् ।

स्थानीय तह निर्वाचनको मत परिणामअनुसार लम्की चुहाको प्रमुखमा कांग्रेस र उपप्रमुखमा एमाले विजयी भएका छन् । बर्दगोरियाको प्रमुखमा एमाले र उपप्रमुखमा माओवादी विजयी भएका छन् ।
यहाँ पर्ने जानकीका चार वडामध्ये तीन वटामा एमाले विजयी भएको छ । त्यस्तै मोहन्याल गाउँपालिकाको ६ वडामध्ये तीन वटामा कांग्रेस, २ वटामा माओवादी र एउटामा एमाले विजयी भएको छ ।
यहाँ दलका वडाध्यक्षले पाएको मतअनुसार एक्लाएक्लैमा एमाले अगाडि छ । एमालेले १७ हजार ८३४ मत पाएको छ । कांग्रेस १३ हजार ८२० मतसहित दोस्रो स्थानमा छ । माओवादीले ८ हजार ७२४ मत पाएको छ ।
त्यस्तै नागरिक उन्मुक्ति पार्टीले ५ हजार २४३, राप्रपाले २ हजार ४०७ र नेकपा एकीकृत समाजवादीले २ हजार ३०६ मत पाएको छ ।

आगामी मंसिर ४ गतेको निर्वाचनमा सत्ता गठबन्धनको तर्फबाट साझा उम्मेदवार भएका भगत बडूवाल यस अघि पनि निर्वाचित सांसद हुन् । उनी २०६४ सालको पहिलो संविधान सभामा निर्वाचित भएका थिए ।
पहिलो जितको १५ वर्ष पछि उनी दोस्रो जितको खोजीमा छन् । यस पटक उनको प्रतिस्पर्धा अघिल्लो पटकका विजेता झपट रावल र नागरिक उन्मुक्तिका अरुण चौधरीसँग भइरहेको छ ।
बडूवाललाई हराएर रावल एमालेको जीतको ह्याट्रिक गर्ने लक्ष्यमा छन् । बडुवाल भने एमालेको जीत शृङ्खलामा ब्रेक लगाएर २०६४ कै नतिजा दोहो¥याउने दाउमा छ ।

‘अघिल्लो पटक यहाँबाट जितेर गएपछि पनि केही गर्न नसकेको आरोप छ । यस पटक फेरि उहाँलाई जिताउने मनसायमा यहाँका नागरिकहरू छैनन्’, बडूवालले भने, ‘गठबन्धनका उम्मेदवारहरूलाई जनताले भारी मतले विजयी बनाउनुहुनेछ ।’
उम्मेदवार बडुवालले अघिल्लो पटक जितेका सांसदले केही गर्न नसकेको भन्दै यस पटक आफूलाई जनताले जिताउने विश्वास व्यक्त गरे ।
रेशम चौधरीको पार्टी नागरिक उन्मुक्तिका उम्मेदवार अरुण चौधरीले पनि कैलाली २ मा आफ्नो जीत निश्चित रहेको दाबी गरेका छन् ।
कांग्रेसमा छँदा महासमिति सदस्य रहेका चौधरी अघिल्लो पटक कांग्रेसबाट प्रदेशसभा र त्यसअघि मधेसी जनअधिकार फोरम नेपाल लोकतान्त्रिकबाट लम्की चुहाको मेयरमा उम्मेदवार बनेका थिए । उनी दुवै पटक झिनो मतान्तरले पराजित भए ।

२०७४ सालमा लम्की चुहाको मेयरमा एमालेका महादेव बजगाईं ७ हजार १८८ मत ल्याएर विजयी हुँदा फोरम लोकतान्त्रिकबाट निर्वाचनमा होमिएका चौधरीले ६ हजार २२२ मत पाएका थिए ।
फोरम लोकतान्त्रिक र कांग्रेसको एकता पछि चौधरी कांग्रेसबाट प्रदेश २ को ‘२’ मा उम्मेदवार बनेका थिए । एमाले र माओवादीको वाम गठबन्धनसँग उनी ८४४ मतले पराजित भए ।

अघिल्लो दुई पटक आफू एक हजार मत भन्दा कमले पराजित भएको भन्दै यस पटक आफ्नो जित सुनिश्चित भएको चौधरीको दाबी छ ।
‘यसअघि प्राविधिक कारणले म झिनो मतले हारेको थिएँ । तर, यस पटक जीत पक्का हो’, उनले भने, ‘नागरिकहरूले अहिले नागरिक उन्मुक्तिलाई विश्वास गरिरहनुभएको छ ।’