धनगढी- नेपाली कांग्रेसका सुदूरपश्चिम प्रदेश सभापति एवम् कैलाली निर्वाचन क्षेत्र नम्बर ४ बाट प्रतिनिधी सभाका सदस्य विजयी वीरबहादुर बलायरले सपथ खाए लगतै प्रदेश राजधानीको विषयमा आफ्नो धारणा सार्वजनिक गर्ने बताएका छन् । विजय भएपछि विहीबार अत्तरियामा सञ्चारकर्मीहरुसंग कुरा गर्दै उनले राजधानीका विषयमा धारणा सार्वजनिक गर्ने बताएका हुन् ।

उनले यस विषयमा संसदमा आवाज उठाउने बताए । चुनाव जित्नु भनेको अवसर र चुनौती दुबै भएकाले आफूले यसलाई चुनौतीका रुपमा लिएको बताए । यस क्षेत्रका मतदाताले विश्वास गरेका कारण आफू विजय भएको भन्दै उनले सुदूरपश्चिम समाज र कैलाली ४ का जनताको भावना अनुसार काम गर्ने बताए ।

‘मन्त्री हुने अवसर पाएँ भने यस क्षेत्रका जनतालाई काम नलाग्ने मन्त्रालय लिँदैन,’ उनले भने, ‘समाज रुपान्तरणका लागि सघाउन पुर्याउँदै भने त्यो मन्त्रालयले केही हुनेवाला छैन ।’ संसदमा सरकारलाई ध्यानाकर्षण गर्नका लागि आफूलाई दिएको विश्वास गुम्न नदिने उनको भनाइ छ । विगतका कमिकमजोरीहरुलाई सच्याएर मात्रै अगाडि बढनुपर्ने उनले बताए । उनले छिटै गेटा मेडिकल कलेजको कार्यदिशा बनाएर सञ्चालनमा ल्याइनेसमेत बताए ।

बलायर कैलाली ४ मा २६ हजार १७१ मत ल्याएर विजय भएका हुन् । उनका निकटतम प्रतिद्वन्द्वी नेकपा एमालेका लेखराज भट्टले २२ हजार ५३३ मत ल्याएर पराजित भए ।