धनगढी- सुदूरपश्चिम प्रदेशसभा सदस्य प्रकाशबहादुर देउवाले धनगढीमा विहीबार ग्रडरको ठक्करबाट १४ वर्षीया किशोरी चेतना साउँदको मृत्युपछि उत्पन्न परिस्थितिलाई वार्ता र संवादबाट समाधान गर्न आग्रह गरेका छन् ।
विज्ञप्ति जारी गर्दै उनले किशोरीको मृत्युले आफू मर्माहित भएको भन्दै उत्पन्न पछिल्लो परिस्थितिलाई गम्भीरतापूर्वक लिई समस्या समाधान गर्न पीडित पक्ष र प्रशासनलाई आग्रह गरेका हुन् ।
‘विद्यार्थी साउँदको मृत्युपछि उत्पन्न परिस्थितिलाई गम्भीरतापूर्वक लिई तत्काल मृतकका परिवारजन र आन्दोलनरत पक्षका माग र मुद्दालाई तत्काल सम्बोधन गर्न स्थानीय प्रशासनलाई जोडदार माग गर्दछु,’ उनले विज्ञप्तिमा भनेका छन् ।
आन्दोलनरत पक्षलाई संयमता अपनाउन आग्रह गर्नुका साथै उनले दोषीमाथि कारबाही र मृतकका परिवारजनलाई क्षतिपूर्तिको व्यवस्था गर्न पनि माग गरेका छन् ।
साथै उनले पीडितको न्यायका लागि आवश्यक कानुनी उपचारको प्रकृयामा आफ्नो पूर्ण साथ र सहयोग रहने समेत प्रतिबद्धता जनाएका छन् । देउवा धनगढीबाट नवनिर्वाचित सुदूरपश्चिम प्रदेशसभा सदस्य हुन् ।
