काठमाडौं- लुम्बिनी प्रदेशको मुख्यमन्त्रीको कार्यालय स्थायी राजधानी दाङमा सारिएको छ । गएराति मुख्यमन्त्री तथा मन्त्रिपरिषद् कार्यालयका सामानहरू बुटवलबाट स्थायी राजधानी दाङको देउखुरी लगिएको हो । राति तीनवटा ट्रकमा मुख्यमन्त्री कार्यालयका सामानहरू लोड गरी दाङ लगिएको लुम्बिनी प्रदेश सरकारका प्रवक्ता तिलकराम शर्माले जानकारी दिए ।

उनका अनुसार मुख्यमन्त्रीको कार्यालय मंगलबार दाङमै स्थापना गरिनेछ । ‘अब मुख्यमन्त्री कुलप्रसाद केसीले दाङमै बसेर काम गर्नुहुनेछ,ु उनले भने । २० असोज २०७७ मा लुम्बिनी प्रदेशसभाको दुई तिहाइ बहुमतले प्रदेशको नाम लुम्बिनी र स्थायी राजधानी राप्ती उपत्यका देउखुरीमा राख्ने घोषणा गरेको थियो ।

तर, प्रदेशसभाको दुई तिहाइ बहुमतले निर्णय गरेको दुई वर्ष भइसक्दा पनि राजधानी दाङ सर्न सकेको थिएन । ४ मंसिरमा सम्पन्न प्रदेशसभा निर्वाचनबाट निर्वाचित प्रदेशसभा सदस्यहरूलाई नवनिर्मित प्रदेशसभा भवनमै शपथग्रहण गराउने तयारी पनि भएको छ । करिब १८ विघा क्षेत्रफलमा रहेको राप्ती प्राविधिक शिक्षालय परिसरमा मन्त्रालयका लागि आवश्यक भवन निर्माणको काम अन्तिम चरणमा पुगेको छ ।

यसअघि पर्यटन, ग्रामीण तथा शहरी विकास र स्वास्थ्य, जनसंख्या तथा परिवार कल्याण मन्त्रालय दाङ सरिसकेका थिए । अब एक साताभित्रै आन्तरिक मामिला मन्त्रालय, अर्थ मन्त्रालय र कोष तथा लेखा नियन्त्रण कार्यालय पनि बुटवलबाट दाङ सार्ने तयारी छ । यसअघि कांग्रेस रुपन्देहीले पूर्वाधार बनिनसकेकाले बुटवलबाट मन्त्रालय दाङ नसार्न आग्रह गरेको थियो । यसैगरी, एमाले रुपन्देही र रुपन्देहीबाट निर्वाचित उसका सांसदहरूले पनि संरचना तयार नहुँदै मन्त्रालय नसार्न आग्रह गरेका थिए ।