काठमाडौं- कतारमा जारी २२ औं संस्करणको फिफा विश्वकप फुटबलको दोस्रो सेमिफाइनलमा फ्रान्स र मोरक्काले प्रतिस्पर्धा गर्दैछन् । यी दुई टोलीबीचको खेल बुधबार राति १२ः४५ देखि अल बेत स्टेडियममा सुरु हुनेछ ।
क्वार्टरफाइनलमा फ्रान्सले इंग्ल्याण्डलाई २–१ ले हराएको थियो । पहिलोपटक सेमिफाइनल पुगेको मोरक्कोले क्वार्टरफाइनलमा पोर्चुगललाई १–० ले स्तब्ध बनायो ।
शानदार लयमा रहेका यी दुई टिमबीचको सेमिफाइनल प्रतिस्पर्धा रोमाञ्चक हुने अनुमान गरिएको छ । जारी विश्वकपमा मोरक्को अपराजित छ । उसले एक गोल बेहोरेको छ त्यो पनि आत्मघाती । जारी विश्वकपमा मोरक्काले पोर्चुगल, बेल्जियम, क्यानडा र स्पेनलाई हराएको छ । समूह चरणमा मोरक्कोले क्रोएसियासँग भने गोलरहित बराबरी खेलेको थियो ।
गत विश्वकप विजेता फ्रान्सको कुरा गर्दा जारी संस्करणमा उसले समूह चरणमा अस्ट्रेलिया र डेनमार्कलाई हराउँदा ट्युनिसियाविरुद्ध १–० को हार बेहोर्यो । त्यस्तै, फ्रान्सले नकआउट चरण खेलमा पोल्याण्डलाई ३–१ ले तथा क्वार्टरफाइनलमा इंग्ल्याण्डलाई २–१ गोल अन्तरले पाखा लगायो ।
फ्रान्स अगाडि
यी दुई टिमले पहिलोपटक सन् १९६३ मा एकअर्काविरुद्ध अन्तर्राष्ट्रिय फुटबल खेलेका थिए । हालसम्म मोरक्को र फ्रान्सले ११ खेलमा एकअर्काविरुद्ध खेलेका छन् । सो खेलमा मोरक्कोले फ्रान्सलाई २–१ ले हरायो । त्यसयता भने उसले फ्रान्सलाई हराउन सकेको छैन । यद्यपि मोरक्कोले तीन खेलमा भने फ्रान्सलाई बराबरीमा रोकेको विगत छ ।
फ्रान्सले मोरक्कोविरुद्धको ११ खेलमध्ये सात खेलमा जित निकालेको छ । यी दुई टिमले पछिल्लोपटक सन् २००७ मा एकअर्काविरुद्ध खेलेका थिए । सो मैत्रीपूर्ण खेल २–२ को बराबरीमा सकिएको थियो । हालसम्म मोरक्को र फ्रान्सले विश्वकपमा एकअर्काको सामना गरेका छैनन् । बुधबार राति दुवै टिम विश्वकपको पहिलो भेटमै जित निकाल्दै फाइनलको यात्रा गर्ने सोचमा हुने छन् ।
