कञ्चनपुर- कृष्णपुर नगरपालिकामा स्वास्थ्य सम्बन्धी कार्यक्रम ‘‘नागरीकसँग मेयर’’ को शुभारम्भ गरिएको छ । मंगलबार नगरप्रमुख हेमराज ओझाले वडा नम्बर ५ को पवित्रा बस्तीबाट र नगरका अरू आठ वडाबाट सम्बन्धित वडाका वडाध्यक्षहरूको उपस्थितिमा एकसाथ उक्त कार्यक्रमको सुरुवात गरिएको हो ।
‘‘नागरिकसँग मेयर’’ कार्यक्रम को उद्घाटनपछि नगरप्रमुख हेमराज ओझाले कृष्णपुर नगरपालिकामा बसोबास गर्ने प्रत्येक नागरिकको स्वास्थ्य अवस्था बुझ्न स्वास्थ्यकर्मीको टिमसहित घरदैलोमा पुग्न चाहेको बताए । उनले आफूले निर्वाचन भएदेखि नै शिक्षा र स्वास्थ्य क्षेत्रलाई प्राथमिकता राखेर काम गर्ने योजना अनुरूप नै यो कार्यक्रम सुरुवात गरिएकोले नागरिकले यसको फाइदा लिन सक्नुपर्ने बताए ।
नगरप्रमुख ओझा भन्छन् विकास निर्माणका कामहरू सिलसिलाबद्ध रूपमा अगाडि बढ्दै जान्छन् कहिदिन ढिला सुरु भएपनी खासै फरक पर्दैन तर नागरिकको स्वास्थ्य गम्भीर विषय भएकोले आफ्नो कार्यकालभरि पहिलो प्राथमिकता स्वास्थ्यले नै पाउनेछ ।
नागरिकसँग मेयर कार्यक्रमबारे नगरप्रमुख ओझा भन्छन् सुरुवातमा स्वास्थ्यकर्मीले नौ वटा वडाका प्रत्येक नागरिकका घर घरमा पुगेर रक्तचाप (BP) चेकजाँच गर्नुहुन्छ,नागरिकको थप स्वास्थ्य अवस्था बुझ्नुहुन्छ त्यसपछि त्यसबाट के रिपोर्ट निस्किन्छ,क-कसलाई सामान्य र जटिल समस्या छ त्यसका आधारमा बृहत् योजनाका साथ दोस्रो चरणमा स्वास्थ्य शिविर सञ्चालनमा ल्याइनेछ ।
दक्ष जनशक्ति सहितको स्वास्थ्यकर्मीको टोली प्रत्येक नागरिकको घर घरमा पुग्ने भएकोले यो कार्यक्रम नागरिकका लागि अत्यन्तै फलदायी हुने कृष्णपुर नगरपालिका स्वास्थ्य शाखा प्रमुख रतन सिंह विष्टले बताए । सुरुवातमा नागरिकसँग मेयर कार्यक्रमका लागि १५ दिन छुट्टाइए पनि पछि आवश्यकता अनुसार कहिदिन थप्न सकिने बिस्ट बताउँछन् ।
हाल कृष्णपुर नगरपालिका वडा न ५ मा रहेको कृष्णपुर स्वास्थ्य चौकी चिकित्सक सहित चौबिसै घण्टा सञ्चालनमा रहेको छ । त्यसैगरी नगरपालिकाले सुत्केरी महिला,ज्येष्ठ नागरिक,शारीरिक रूपमा अशक्त नागरिक र आर्थिक हिसाबमा कमजोर बिरामीलाई निःशुल्क एम्बुलेन्स सेवा दिँदै आएको छ ।
त्यस्तै कृष्णपुर नगरपालिकाका नगरप्रमुख हेमराज ओझाले धनगढी रक्त सञ्चार केन्द्रसँग समन्वय गर्दै नगरका नागरिकलाई रगत आवश्यक परे नगरपालिकाको परिचय खुल्ने कागज उपलब्ध गराएर निःशुल्क रगत पाउने व्यवस्था समेत मिलाएका छन् ।
