काठमाडौँ- नेकपा (एमाले) का तर्फबाट महोत्तरी क्षेत्र नम्बर–१ बाट निर्वाचित प्रतिनिधि सभा सदस्य लक्ष्मी महतो कोइरीलाई पक्राउ गर्न प्रहरीले आफ्ना ७७ जिल्लाकै कार्यालयलाई सर्कुलर जारी गरेको छ । गृह मन्त्रालयले कोइरीलाई पक्राउ गर्न प्रहरी प्रधान कार्यालयलाई लिखित पत्राचार गरेपछि प्रहरीले सबै जिल्लामा सर्कुलर जारी गरेको हो ।

प्रहरी प्रवक्ता प्रहरी नायव महानिरीक्षक (डिआइजीपी) टेकप्रसाद राईले प्रतिनिधि सभा सदस्य कोइरीलाई पक्राउ गर्न केही दिन अघि नै ७७ जिल्ला प्रहरी कार्यालयलाई सर्कुलर गरिसकिएको जानकारी दिए । अब केही दिनमै प्रहरीले सांसद कोइरीलाई नियन्त्रणमा लिने बताए । ‘हामीले ७७ जिल्लामा सर्कुलर गरेका छौँ,’ प्रहरी प्रवक्ता डिआइजी राइले भने, ‘कानुन अनुसार नियन्त्रणमा लिन प्रहरी तदारुकतासाथ लागिरहेको छ ।’

प्रहरी प्रधान कार्यालय र गृह मन्त्रालयबीच सांसद कोइरीलाई पक्राउ गर्नेबारे विवाद देखिएको छ । गृह मन्त्रालयले ६ माघमा सांसद कोइरीलाई पक्राउ नगरेकोमा विज्ञप्ति निकालेर प्रहरीको कामप्रति असन्तुष्टि जनाएको थियो । मन्त्रालयका प्रवक्ता फणिन्द्रमणि पोखरेलले जारी गरेको विज्ञप्तिमा भनिएको थियो, ‘उपप्रधानमन्त्रीज्यूबाट पटक पटक प्रहरीलाई मौखिक निर्देशन भएकोमा हालसम्म पक्राउ नपरेको प्रति मन्त्रालयको गम्भीर ध्यानाकर्षण भएको छ ।’

महोत्तरीको गौशाला नगरपालिका–२ का स्थानीय कोइरीलाई हत्या अभियोगमा उच्च अदालत जनकपुरले थुनामा राखेर मुद्दाको पुर्पक्ष गर्न आदेश दिएको छ । अदालतबाट जारी कोइरीको पक्राउ पुर्जी प्रहरीसँग छ । सांसद कोइरीमाथि २०७२ को मधेस आन्दोलनमा सशस्त्र प्रहरीका असई थमन विकलाई लखेटेर हत्या गरेको आरोप छ । उनीविरुद्ध प्रेम बहादुर विकले जिल्ला प्रहरी कार्यालय महोत्तरीमा कर्तव्य ज्यान मुद्दाको जाहेरी दिएका थिए ।

२०७२ भदौ २५ मा आन्दोलनकारीको कुटाइबाट गम्भीर घाइते भएका विकलाई उपचारका लागि जनकपुर लैजाने क्रममा एम्बुलेन्सबाट थुतेर हत्या गरिएको थियो । जिल्ला अदालत महोत्तरीले २०७६ असोज २ मा कोइरीलाई १ लाख धरौटीमा छाड्ने आदेश दिएपछि त्यसविरुद्ध प्रहरी पुनरावेदन गरेको थियो । जनकपुर उच्च अदालतले जिल्लाको आदेशलाई उल्ट्याउँदै पक्राउ गरी पुर्पक्ष गर्न आदेह दिएको हो ।
फौजदारी अभियोगमा सांसदलाई पक्राउ गरेको जानकारी छिटोभन्दा छिटो सभामुखलाई दिनुपर्ने कानुनी व्यवस्था छ ।