धनगढी- लोकसेवा आयोगको तेस्रो सम्मेलन आजबाट धनगढीमा सुरु भएको छ । दुई दिनसम्म सञ्चालन हुने सम्मेलनको लोकसेवा आयोगका अध्यक्ष माधवप्रसाद रेग्मीले उद्घाटन गरे ।
सो क्रममा उनले अधिकार, कर्तव्य, जिम्मेवारी र सीमितता बुझ्दै समन्वय गरेर अगाडि बढ्न प्रदेश लोकसेवा आयोगलाई आग्रह गरे । विधि, पद्धतिलाई साटासाट गर्दै प्रदेश लोकसेवा आयोगलाई बलियो बनाउने लोकसेवा आयोग केन्द्रीय कार्यालयको उद्देश्य रहेको उनको भनाइ छ ।
उद्घाटन सत्रमा सुदूरपश्चिम प्रदेशका मुख्यसचिव नारायणप्रसाद शर्मा दुवाडी, सुदूरपश्चिम प्रदेश लोकसेवा आयोगका अध्यक्ष यज्ञराज बोहरा, कर्णाली प्रदेश लोकसेवा आयोगका अध्यक्ष रामप्रसाद उपाध्यायले शुभकामना मन्तव्य दिए ।
यसैगरी, लुम्बिनी प्रदेश लोकसेवा आयोगका अध्यक्ष तिलाराम ओझा, गण्डकी प्रदेश लोकसेवा आयोगका अध्यक्ष विष्णुप्रसाद नेपाल, बागमती प्रदेश लोकसेवा आयोगका अध्यक्ष सुरेशमान श्रेष्ठ, कोशी प्रदेश लोकसेवा आयोगका अध्यक्ष माधवप्रसाद रेग्मी र मधेश प्रदेश लोकसेवा आयोगका सदस्य डा। सुजाता देवले शुभकामना मन्तव्य राख्नुभएको थियो ।
सम्मेलनमा सातवटै प्रदेश लोकसेवा आयोगका पदाधिकारीसहित कर्मचारीको सहभागिता थियो । धनगढी घोषणापत्र जारी गर्दै शनिबार सम्मेलन सम्पन्न हुने जनाइएको छ ।
