धनगढी- पूर्व राजा ज्ञानेन्द्र शाह सुदूरपश्चिमको धनगढीमा आउने भएका छन्। देश तथा बिदेशको भ्रमणको दौरानमा रहेका पूर्व राजा शाह जेठ ६ गते धनगढीमा आउने भएका हुन्। धनगढीमा पूर्व राजाको नागरिक अभिनन्दन हुने भएको छ।
पूर्व राजाको नागरिक अभिनन्दनका लागि एक हजार एक सदस्यीय नागरिक अभिनन्दन मुल समारोह समिति गठन भएको छ। पूर्व मन्त्री जयन्त चन्दको संयोजकत्वमा मुल समारोह समति गठन भएको नागरिक अभिनन्दन समारोहका सञ्चार संयोजक ललित जोशीले बताए।
पूर्व राजाको ६ गते दिउँसो २ बजे धनगढीको कभर्ड हलमा विशाल समारोका बिच नागरिक अभिनन्द गरिने जोशीले बताए। नागरिक अभिनन्दनका लागि जेठ पाँच गते पूर्व राजपरिवार धनगढी पुग्ने छन्।
पूर्व युवराज पारस शाह बाहेक राजपरिवारका सबै सदस्य धनगढी आउने कार्यक्रम तय भएको जोशीले बताए। जेठ ६ गते सुदूरपश्चिमका हजारौं मानिस पूर्व राजाको अभिनन्दन समारोहमा उपस्थित हुने जोशीले बताएका छन्।
पूर्वराजा ज्ञानेन्द्र शाह अहिले भारतमा छन्। उनले अयोध्यास्थित राम मन्दिरको दर्शन गरेका छन्।पूर्वराजा शाहले आइतबार राम मन्दिर पुगेर भगवान रामको दर्शन गरेको पूर्वराजा शाहको सचिवालयले जनाएको छ।
पूर्वराजा शाहसँगै पूर्वरानी कोमलले पनि राम मन्दिर पुगेर भगवान रामको दर्शन गरिन्। केही दिनअघि पूर्वराजा शाहले उत्तर प्रदेशका मुख्यमन्त्री योगी आदित्यनाथसँग भेट गरेका थिए।
