धनगढी । कांग्रेसका कमलबहादुर शाह मुख्यमन्त्री भएको एक सय दिन पूरा भएको छ । आफ्नो कार्यकालको एक सय दिन पूरा भएकै दिन मुख्यमन्त्री शाहले मन्त्रिपरिषद्लाई पूर्णता दिने तयारी गरेका छन् ।

मन्त्रालयको भागवण्डा नमिल्दा सुदूरपश्चिममा सरकारले पूर्णता पाउन सकेको थिएन । सत्ता गठबन्धनबीच भागवण्डा मिलेसँगै मुख्यमन्त्री शाहले मन्त्रिपरिषद्लाई पूर्णता दिने तयारीमा लागेका छन् । गत फागुन २१ गते संसदबाट विश्वासको मत लिएका मुख्यमन्त्री शाहले शुक्रबार सरकारले एक सय दिनमा गरेका काम र उपलब्धी पनि सार्वजनिक गरेका छन् । मुख्यमन्त्री शाहले सकेसम्म आजै सरकारले पूर्णता पाउने बताए ।

‘गठबन्धनका दलहरूलाई सरकारमा सहभागी गराउने प्रयास भइरहेको छ । सबै दलले नाम पठाए आजै मन्त्रिपरिषद् विस्तार हुन्छ,’ उनले भने । तत्कालीन एमाले नेतृत्वको सरकार ढलेपछि माघ २६ मा कांग्रेस शाह मुख्यमन्त्री नियुक्त भएका थिए ।

माओवादी केन्द्रले टुंगो लगायो मन्त्रीको नाम

नेकपा माओवादी केन्द्रले सुदूरपश्चिम प्रदेश सरकारमा सहभागी हुने मन्त्रीको नाम टुंगो लगाएको छ । माओवादीले दुई मन्त्री र एक राज्यमन्त्री पाउने टुंगो लागेको माओवादी संसदीय दलका नेता खगराज भट्टले बताए ।

दुई मन्त्रालय पाएको माओवादीले सामाजिक विकास र उद्योग, पर्यटन, वन तथा वातावरण मन्त्रालय लिएर झपट साउद र रमेश धामीलाई सरकारमा पठाउने भएको हो । भट्टका अनुसार सांसद गीतादेवी माललाई राज्यमन्त्री बनाउने तयारी भएको छ । उनीहरूको शपथग्रहण आजै गर्ने तयारी भइरहेको भट्टले बताए ।

भागवण्डाअनुसार गठबन्धनमा आवद्ध दल नेकपा माओवादी केन्द्र २, नेपाली कांग्रेसले तीन र नागरिक उन्मुक्ति पार्टीले एक मन्त्रालय पाउने गरी सहमति जुटेको उनले बताए ।

दुई मन्त्रायल नपाए नागरिक उन्मुक्ति सरकारमा नजाने

नागरिक उन्मुक्ति पार्टीले भने दुई मन्त्रायल नपाए सरकारमा नजाने बताएको छ । उन्मुक्तिका संसदीय दलका नेता घनश्याम चौधरीले नाउपाले दुई मन्त्रालय नपाए सरकारमा सहभागी नहुने बताए । नाउपाले सामाजिक विकास मन्त्रालय र भूमि व्यवस्था, कृषि तथा सहकारी मन्त्रालय आफूले पाउनुपर्ने माग गरेको छ ।

‘हामीले दुई मन्त्रालय पानुपर्ने माग राखेका छौँ । यदि आफ्ना माग पूरा नभए मन्त्रिपरिषद् विस्तारलाई बहिष्कार गर्छौं,’ उनले भने ।