बैतडी- बैतडीमा एक जना वडाध्यक्षले वडा कार्यालयको केन्द्र अन्यत्र सारेपछि नागरिक आन्दोलित बनेका छन्। जिल्लाको सुर्नया गाउँपालिका–६ का वडा अध्यक्ष पदमराज अवस्थीले जनताहरूलाई कुनै जानकारी नगराएर रातारात कार्यालय अन्यत्र सारेका हुन् ।
कार्यालय अन्यत्र सारिएपछि सङ्घर्ष समिति गठन गरेर वडावासी आन्दोलित भएका हुन् । वडा कार्यालय रहेको पुरानो ठाउँ लम्भ्वाबाट वडा अध्यक्षले आफू बस्ने ठाउँ नजिक शिवालय भन्ने स्थानमा वडा कार्यालय स्थापना गरेका पूर्व वडा अध्यक्ष एवं सङ्घर्ष समिति संयोजक जय बहादुर कुँवरले जानकारी दिए । वडाध्यक्षले साउन ४ गते राति वडा कार्यालय सारेका बताइएको छ ।
वडा अध्यक्षले वडा कार्यालय आफू बस्ने ठाउँ नजिक स्थापना गरेपछि अहिले नागरिकहरू आन्दोलनमा उत्रिएका उनले बताए।वडा अध्यक्षले मनोमानी ढङ्गबाट कार्यालय सेवाग्राहीको पहुँच भन्दा टाढा एकान्त कुनामा लगेपछि आफू आन्दोलित भएका स्थानीय रतन कुँवरले बताए । वडावासी र घर धनीलाई समेत थाहा नगराएर सार्वजनिक सूचना विना वडा अध्यक्षले कार्यालय अन्यत्र सारेको उनको आरोप छ।
आन्दोलित जनताहरूले सबैको पाइक पर्ने स्थान खालि डाँडामा वडा कार्यालय स्थापना हुनु पर्ने माग राखेका छन्। सेवाग्राहीलाई सहज हुने स्थान खालि डाँडामा वडा कार्यालय स्थापना नभए थप सङ्घर्षका कार्यक्रम गरिने आन्दोलनकारीको चेतावनी छ ।
यता वडा अध्यक्ष अवस्थीले जनप्रतिनिधिहरूको बैठकबाट निर्णय गरेर वडा कार्यालय सारेको बताए ।साबिकको वडा कार्यालयमा सेवा प्रवाह गर्न समस्या भएपछि वडा कार्यालय प्रक्रियागत हिसाबले सारिएको उनले दाबी गरे ।
