धनगढी- धनगढी उपमहानगरपालिका वडा नम्बर १७ का स्थानीय आन्दोलित भएका छन् । धनगढी उपमहानगरपालिकाले जथाभाबी नदीजन्य पदार्थ उत्खनन गराएको भन्दै स्थानीयहरू आज देखी आन्दोलित भएका हुन्।
मनोमानी ढङ्गले नदीजन्य पदार्थ उत्खनन गरिँदा बस्ती जोखिममा परेको उनीहरूको भनाई छ । उनीहरूले आज धनगढी वडा नम्बर ८ र १७ जोड्ने पुलमा टायर बाल्दै प्रदर्शनमा उत्रिँदै आन्दोलित बनेका छन् ।
उनीहरूले उपमहानगरपालिकासँग नदीजन्य पदार्थ उत्खनन मापदण्ड अनुसार मात्र उत्खनन गरिनुपर्ने, क्षतिग्रस्त ठाउँलाई रेड एरिया तोकिनुपर्ने, कुनै कुनै ठाउँमा नदिको धार परिवर्तन गरिनुपर्ने माग राखेका छन्।
यस्तै कुल आम्दानीको २० प्रतिशत रकम खोला वा वडाको विकासमा लगानी गर्नुपर्ने, क्षति हुने ठाउँमा उचित तटबन्धको व्यवस्था गर्नुपर्ने लगायतका माग राखेका छन् ।
२०७४ सालदेखि सो नदिमा नदीजन्य पदार्थ उत्खनन भइरहेको भए पनि वडा बिग्रिएका सडकमा ग्राभेल हाल्ने, कटानबाट जोगाउन तटबन्ध लगायतका कुनै पनि कार्य नबढाएको स्थानीय हर्षराज रानाले बताए ।
धनगढी उपमहानगरले सबैभन्दा बढी नदीजन्य पदार्थ यहि खोलाबाट संकलन गर्ने भएकाले त्यसको २० प्रतिशत वडामा लगानी गर्नु भन्दा पनि काम नभएको बताए।
उपमहानगरपालिकाले आफूहरूलाई झुटा आश्वासन बाहेक केही नदिएको स्थानीयको भनाई छ । यता वडाका वडा अध्यक्ष माधव रानाले खुटिया खोलामा जथाभाबी नदीजन्य पदार्थ उत्खनन हुँदा खेती योग्य जमिन कटान हुने, बनेका भौतिक संरचना सडक, झोलुङ्गे पुल लगायतमा क्षति पुगिरहेको बताए ।
वडाको बजेट न्यून भएकाले बस्ती संरक्षणका लागि तटबन्धअघि बढाउन नसकिएको र उपमहानगरपालिकामा अनुरोध गर्दा पनिसुनुवाई नभएको भन्दै प्रदेश र संघ सरकारलाई गुहारेको उनले बताएका छन् ।
