धनगढी- मदिरा कारोबार नियमनका लागि सरकारले स्पष्ट नीति बनाउनुपर्ने सरोकारवालाहरुले बताएका छन् । सिविन–नेपालको आयोजनामा धनगढीमा बिहीबार मदिराको प्रयोगबाट बालबालिका र महिलामाथि परेको असर विषय छलफल कार्यक्रममा सहभागी सरोकारावालाहरुले यस्तो धारणा राखेका हुन् ।
कार्यक्रममा बोल्दै सिविन नेपालका कार्यक्रम निर्देशक कुमार भट्टराईले मदिरा नियमनका लागि सरकारले अहिलेसम्म स्पष्ट नीति बनाउन नसकेको बताए । नेपालमा मदिरा कारोबार गर्ने स्पष्ट नीति नभएका कारण यसले गम्भीर असर पुर्याइरहेको भन्दै उनले भएका नीति पनि कार्यान्वयन हुन नसकेको बताए ।
‘मदिराको कारोबार बढाउन उल्टै अनैतिक प्रचारप्रसार हुँदैछ,’ भट्टराईले भने, ‘असर पुग्ने गरि हुने प्रचारप्रसार रोक्ने प्रयासम्म पनि हुन सकेको छैन । १८ वर्ष मुनिका बालबालिकालाई बिक्रि वितरणमा समेत रोक लगाउनुपर्छ ।’
मदिराको कारोबार नियमनका लागि सरकारले नीति नबनाएसम्म यसलाई व्यवस्थित गर्न नसकिने फाया नेपालका शेरबहादुर बस्नेले बताए । उनले मदिराको कारोबारका लागि कडा नीति आवश्यक रहेको धारणा राखे ।
धनगढी उपमहानगरपालिका वडा नम्बर १ का वडाध्यक्ष सन्तोष मुडभरीले मदिराको कारोबारलाई व्यवस्थित गर्न स्थानीय तहको भूमिका महत्वपूर्ण हुने बताए । उनले धनगढीमा पनि मदिराको कारोबारलाई व्यवस्थित गर्न पहल थालिने बताए ।
कार्यक्रमका धनगढी उपमहानगरपालिकाका जनप्रतिनिधि, कर्मचारी, मानवअधिकारकर्मी, बालअधिकारकर्मी, किशोर किशोरी, सुरक्षा निकायका प्रतिनिधिलगायतको सहभागिता रहेको थियो । अनौपचारिक रुपमा सञ्चालित कार्यक्रमको सञ्चालन सिविन नेपालका कार्यक्रम प्रदेश संयोजक हरिलाल चौधरीले गरेका थिए ।
