धनगढी- सुदूरपश्चिम प्रदेशका सभामुख भीमबहादुर भण्डारीले प्रदेश सरकार हराएको गुनासो गरेका छन् । प्रदेश सभा गठन भएको दश महिना पुरा भईरहदा सरकारले सभालाई विजनेस दिन नसकेकोमा सभामुख भण्डारीले सरकार हराएको आभास भइरहेको बताएका हुन् ।
युएनडिपी– संसद सहयोग परियोजनाको सहकार्य तथा सञ्चार प्रतिष्ठान नेपालले आयोजना गरेको संसदमा खुलापनको अभ्यास पत्रकार अन्तरक्रिया कार्यक्रममा सभामुख भण्डारीले भने –‘अब सञ्चारकर्मीहरुले प्रदेश सरकार हरायो की भनेर लेखौं । प्रदेशका जनताको सर्वोच्च संस्था हो प्रदेश सभा । तर, सरकारले ऐन, कानुन निर्माण नगर्दा सभाका बैठक बस्न सकेका छैन् ।’
भदौ ४ गते बसेको दोस्रो अधिवेशनको २२ औं बैठकमा सभामुखले अर्को सूचना जारी नभएसम्मका लागि बैठक स्थगित भएको जानकारी दिएका थिए । सभामुख भण्डारीले भने –‘सभाले आफै केही गर्न सक्दैन । कानुन निर्माण गर्ने जिम्मा सरकारको हो । सभालाई विजनेस दिने पनि उनीहरुनै हुन । तर, सरकार मौन छ ।’ उनले पटक–पटक सरकारसंग आग्रह गर्दा समेत नसुनेको गुनासो गरे ।
उनले सरकारको कमजोरीका कारण प्रदेश सभा सदस्य तथा सभामुखहरुले आलोचना खेप्नुपरिरहेको बताए । उने संघिय सरकार र स्थानीय तहको कमजोरीका कारण पनि प्रदेशमाथिनै दोष आइरहेको बताए । उनले भने –‘संघिय सरकारले कानुन बनाउँदैन् । स्थानीय तहहरुमा पनि वेथिति छ । त्यसको अचानो प्रदेश बनेको छ ।
उनले मुख्यमन्त्री तथा पदाधिकारीले लिइरहेको सेवा सुविधामा पनि प्रदेश सभा सदस्य सबै दोषी बन्नुपर्ने अवस्था रहेको बताउँदै –‘सेवा सुविधा मुख्यमन्त्री, मन्त्री र संसदीय दलका नेताहरुले लिइरहेका छन् । समाचार सेवासुविधामै केन्द्रित बने माननियहरु । माननियहरुलाई जबकी यो बारेमा केही थाहा हुँदैन् । जनतामा प्रवाह गर्ने सन्देश यथार्थपरक हुनुपर्छ ।’
