कञ्चनपुर- कञ्चनपुरको बेलडाँडी गाउँपालिकास्थित एक घरमा चोरी भएको छ। बेलडाँडी गाउँपालिका–१ स्थित वसन्त खडायतको घरमा भेन्टिलेटरबाट छिरेर चोरी भएको प्रहरीले जनाएको हो।

खडायतको घरमा कोही नभएको अवस्थामा घरको पछाडिपट्टि रहेको भेन्टिलेटरबाट छिरेर चोरी भएको इलाका प्रहरी कार्यालय बेल्डाँडीले जनाएको छ ।

खडायतले नगद, गरगहना सहित अन्य सामाग्री चोरले चारेर लगेको बताएका छन्। उनले घरमा राखिएको सिलिण्डर ग्यास पनि चोरेर लगेको र घरभित्र कागजात,दराज तोडफोड गरिएको बताए। भेन्टिलेटरबाट छिरेर चोरी भएको जानकारीपछि प्रहरीले खोजी कार्य अगाडी बढाएको जनाइएको छ।

यद्यपि चोरले ढोका भएर चोरी नगरेको र भेन्टिलेटर बाट छिरेर चोरी गरेको भेटिएकाले यसमा दुई वा बढीको संलग्नता हुन सक्ने प्रहरीको आशंका छ। शुक्रवार प्रहरी टोलीले उनको घरमा मुचुल्का उठाउँदै चोरीमा संलग्नको खोजी भइरहेको र घटनाबारे थप अनुसन्धान भइरहेको जनाएको छ।