धनगढी- सुदूरपश्चिम प्रदेशमा सवारी दुर्घटना बढ्दै गएका छन् । गत आव २०७९÷८० को १० महिनाको तुलनामा चालु आवका १० महिनामा सवारी दुर्घटनामा बृद्धि भएको हो ।

गत आवको बैशाखसम्म २ सय २० वटा सवारी दुर्घटना भएकोमा चालु आवमा २ सय ६० वटा सवारी दुर्घटना भएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरियाले जनाएको छ । दुर्घटना बढे पनि मृतकको संख्यामा भने कमी आएको कार्यालयले जनाएको छ । गत आवमा सो अवधिमा सवारी दुर्घटनाबाट १ सय ५५ जनाको मृत्यु भएको र चालु आवमा एक सय ४५ जनाको मृत्यु भएको कार्यालयका  डिएसपी अनिलकुमार उप्रेतीले जानकारी दिए ।

चालु आवको दश महिनामा सवारी दुर्घटनामा परी चार सय ५५ जना घाइते भएको उनले बताए । नियम उल्लंघन गर्ने सवारीको संख्यामा पनि कमी आएको उनले बताए । गत आवको १० महिनामा ९२ हजार ७ सय ५ सवारीसाधन कार्बाहीमा परेकोमा चालु आवको सो अवधिमा ६२ हजार ९ सय ३१ वटा विभिन्न सवारी साधन ट्राफिक कार्बाहीमा परेको उनले जानकारी दिए ।

उनका अनुसार चालु आवमा सवारी साधन कार्बाहीबाट ४ करोड १६ लाख ११ हजार राजस्व संकलन भएकोे छ । उनले भने ‘हामीले विभिन्न जनचेतनामुलक कार्यक्रम गर्दै आएका छौँ । सवारी दुर्घटना घट्न सकेन बढेको छ । ठूला सवारी दुर्घटनामा कमी आएको छ । मृतकको संख्या भने घटेको छ ।’ ‘ट्राफिक नियम पालन गर्ने बढेका छन् । गत वर्षको तुलनामा यस वर्ष कम सवारी साधन कार्बाहीमा परेका छन’,उनले भने ।