धनगढी- कैलाली भन्सार कार्यालयले लक्ष्यको ६७ दशमलव ८१ प्रतिशत राजस्व सङ्कलन गरेको छ । कार्यालयले चालु आर्थिक वर्ष २०८०÷८१ को १० महिनाको निर्धारित लक्ष्यभन्दा ३२ दशमलव १९ प्रतिशत कम राजस्व सङ्कलन गरेको हो ।

कार्यालयको चालु आर्थिक वर्षको साउनदेखि वैशाख मसान्तसम्म ९ अर्ब ५६ करोड ५४ लाख राजस्व सङ्कलनको लक्ष्य रहेकोमा ६ अर्ब ४८ करोड ६० लाखमात्रै राजस्व सङ्कलन भएको कैलाली भन्सार कार्यालयका सूचना अधिकारी पवित्रकुमार खड्काले जानकारी दिए ।

उनका अनुसार साउनमा ४६ करोड ८२ लाख,भदौमा ५१ करोड ९३ लाख,असोजमा ६३ करोड १४ लाख,कार्तिकमा ६१ करोड ४६ लाख र मंसिरमा ७३ करोड ३४ लाख राजस्व सङ्कलन भएको छ । त्यस्तै पुसमा ६८ करोड ९० लाख,माघमा ६६ करोड ६७ लाख,फागुनमा ६९ करोड एक लाख, चैतमा ७२ करोड १३ लाख र वैशाखमा ७५ करोड १७ लाख राजस्व सङ्कलन भएको सूचना अधिकारी खड्काले जानकारी दिए ।

कुनै पनि महिना कार्यालयले लक्ष्य अनुसारको राजस्व संकलन गर्न सकेको छैन् । भन्सार कार्यालयको चालु आर्थिक वर्ष २०८०÷८१ मा ११ अर्ब ५८ करोड २४ लाख राजस्व सङ्कलनको वार्षिक लक्ष्य रहेको छ । कार्यालयको गत आर्थिक वर्ष २०७९÷८० मा १२ अर्ब ३० करोड ६६ लाख राजस्व सङ्कलनको वार्षिक लक्ष्य रहेकोमा ८ अर्ब २९ करोड ६३ लाख मात्रै राजस्व सङ्कलन भएको कार्यालयले जनाएको छ । गत वर्ष राजस्व संकलन लक्ष्यमा पुग्न सकेको थिएन् ।

आयातमा कमी भएसँगै राजस्व संकलन प्रभावित भएको सूचना अधिकारी खड्काले बताए । ‘आर्थिक गतिविधि बढ्न सकेका छैनन् । बढी राजस्व संकलन हुने सामानको आयातमा कमी छ,जसले गर्दा राजस्व संकलन प्रभावित भएको छ’, उनले भने ।