धनगढी- कैलालीको धनगढीस्थित सेती प्रादेशिक अस्पतालको सामाजिक सेवा एकाइमार्फत चालु आवका ११ महिनामा करिब १६ हजार बिरामीले निःशुल्क सेवा लिएका छन् ।

चालु आव २०८०÷८१ को साउनदेखि जेठ मसान्तसम्म १२ वटा लक्षित समूहका १५ हजार नौ सय ९३ जनाले सेवा लिएका हुन् ।
सो अवधीमा लक्षित समूहका आठ हजार तीन सय तीन पुरुष र सात हजार छ सय ९० महिलाले स्वास्थ्य सेवा लिएका सामाजिक सेवा एकाइ प्रमुख गौरीदत्त जोशीले जानकारी दिए । उनका अनुसार सो अवधीमा बिरामीको उपचारको क्रममा चेकजाँच,औषधीलगायतमा आंशिक वा पूर्ण छुट गरि दुई करोड ५३ लाख ३८ हजार पाँच सय ३५ रुपैयाँ बराबर छुट दिइएको छ ।

सामाजिक सेवा एकाइमार्फत गरिब÷अति गरिब सात हजार आठ सय ७४,असहाय आठ सय ८३,अपाङ्गता भएका आठ सय ४२,जेष्ठ नागरिक चार हजार चार सय ५९,लैङ्गिक हिंसा पीडित एक सय ८२,महिला स्वास्थ्य स्वयंसेविका पाँच जना र अन्य एक हजार सात सय ८४ जना बिरामीले स्वास्थ्य सेवा लिएका एकाइ प्रमुख जोशीले जानकारी दिए ।

त्यस्तै प्रहरीले ल्याएका थुनुवा एक हजार चार सय २९,सहिद परिवारका एक जना ,अभिभावक नभएका आकस्मिक बिरामी ५३ जना र प्राकृतिक प्रकोपमा परेका ४३ जना बिरामीले स्वास्थ्योपचार सेवा लिएका उनले जानकारी दिए । सामाजिक सेवा एकाइबाट गरिब,असहाय,अपाङ्गता भएका व्यक्ति,जेष्ठ नागरिक,लैङ्गिक हिंसा पीडितलगायतका १२ किसिमका मापदण्डमा पर्ने बिरामीलाई औषधी,चेकजाँच, उपचारलगायतमा आंशिक वा पूर्ण छुट दिने गरिएको एकाइ प्रमुख जोशीले बताए ।

“लक्षित समूह भित्र पर्ने बिरामीले औषधी उपचारमा अवस्था हेरेर आंशिक वा पूर्ण छुट पाउनुहुन्छ” उनले भने,“बेड भर्ना भएका बिरामीले १० हजारसम्मको निःशुल्क उपचार सेवा पाउनुहुन्छ ।” गत आर्थिक वर्ष २०७९÷८० मा सामाजिक सेवा एकाइबाट २० हजार दुई सय ७१ जनाले सेवा लिएका अस्पतालले जनाएको छ । जसमध्ये १० हजार दुई सय ५५ जना महिला र १० हजार ४६ जना पुरुष रहेको जनाइएको छ । गत वर्ष तीन करोड एक लाख छ हजार २१ रुपैयाँ बराबरको स्वास्थ्य सेवा प्रदान गरिएको सामाजिक सेवा एकाइले जनाएको छ ।