काठमाडौँ – नागरिक उन्मुक्ति पार्टी सुदूरपश्चिम प्रदेश संसदीय दलको नेतामा फेरि घनश्याम चौधरी चयन भएका छन् । २९ असारमा घनश्यामलाई हटाएर खुसीराम चौधरीलाई संसदीय दलको नेता चयन गरिएको थियो । तर, उक्त निर्णयको एक साता नबित्दै पुनः बहुमतले घनश्याम चौधारीलाई दलको नेता चयन गरिएको हो ।
२ साउनमा बसेको बैठकले घनश्यामलाई दलको नेता, लक्ष्मणकिशोर चौधरीलाई प्रमुख सचेतक र इन्दिरा गिरीलाई सचेतक चयन गर्ने निर्णय गरेको हो । सुदूरपश्चिममा नाउपाका सात सांसद् छन् ।
घनश्यामलाई दलको नेता बनाउने निर्णयमा लक्ष्मणकिशोर चौधरी, रामेश्वर चौधरी र इन्दिरा गिरीले हस्ताक्षर गरेका छन् । कैलाश चौधरी, खुसीराम चौधरी र टीका थापाले उक्त निर्णयमा हस्ताक्षर गरेका छैनन् ।
२९ असारमा लक्ष्मणकिशोर चौधरीले हस्ताक्षर गरेर खुसीरामलाई दलको नेता बनाएका थिए भने लक्ष्मणकिशोरले नै २ साउनमा घनश्याम चौधरीलाई दलको नेता बनाउने निर्णयमा पनि हस्ताक्षर गरेका छन् ।
