कैलाली । डिभिजन वन कार्यालय पहलमानपुरले कुनै जानकारी नदिइ घर भत्काएको भन्दै पीडितहरुले नगरपालिकालाई ज्ञापनपत्र बुझाएका छन् ।
वनले १८ वर्षदेखि भोगचलन गर्दै आएको सो जमिनका घर भत्काएपछि भजनी नगपालिकाले सुरक्षित आवासका लागि प्रदेश,संघीय सरकारसँग समन्वय गरी दीर्घकालीन रुपमा व्यवस्थापनका लागि पहल गरिदिन भन्दै पीडितहरुले नगर प्रमुख केवल चौधरीलाई ज्ञापनपत्र बुझाएका हुन् ।
ज्ञापनपत्र बुझ्दै नगरप्रमुख चौधरीले पीडितको पक्षमा काम गर्न अग्रसर भएर लाग्ने प्रतिबद्धता जाहेर गरे। उनले भने ‘घर भत्काएको बिषयमा बुझ्दै छु तपाईहरुको समस्या समाधान गर्न पहल गर्छु । भजनी नगरपालिका १ मा रहेको ४ वटा बस्तीका १०७ घरटहरा यही असार १० गते वनले भत्काइ दिएको थियो । वन कार्यालयले ४ बस्तीका १०७ घरटहरा भत्काई दिए पछि झण्डै ४३५ मानिस विचल्लीमा परेको पीडित वसन्त नेपालीले जानकारी दिए ।
कुनै सूचना टाँस नगरी बस्तीमा ४ वटा डोजर ल्याइ घरटहरा भत्काएपछि मानिस विचल्लीमा पर्दै आएको उनले वताए । उक्त जमिनमा बस्दै आएका मानिसले घरवहाल, बहाल विटौरी कर समेत बुझाउने गरेको नेपालीले बताए ।
‘बस्तीमा नगरपालिकाले ग्राभेल हालेको छ भने बस्तीका मानिसहरु विद्युत उपभोग पनि गर्दे आएका छन्’ उनले भने ‘चारकिल्ला प्रमाणित पनि छ । २०८० सालमा भूमि आयोगले समेत जग्गाको नाप नक्सा गरी छुटयाइ दिएको चिनारी पनि ताजै छ ।
