धनगढी- कैलालीको भजनी नगरपालिका–१ मा विगत १८ वर्षदेखि बस्दै आएको बस्तीलाई डिभिजन वन कार्याल पहमानपुरले डोजर लगाएर हटाएपछि विचल्ली भएको छ । बर्षातका बेला डिभिजन वन कार्यालयले सो बस्तीमा बसोवास गर्दै आएका स्थानीयलाई विना सूचना डोजर लगाएर भत्काएपछि उनीहरु कष्टकर जीवन विताउन बाध्य भएका छन् ।

उनीहरुको घर भत्काएपछि बस्तीमा अहिले विभिन्न खालका समस्या भोग्दै आएका छन् । बस्तीमाअहिले झाडावान्ताको प्रकोप देखा परेको छ । घर भत्काएपछि उनीहरु पालमुनि बस्दै आएका छन् । उनीहरुमा अहिले झाडावान्ताको प्रकोप देखा परेको हो । पालमुनि वस्दै आएका करिव चार सय ३५ संख्याको हाराहारीमा रहेका मध्ये केहीमा झाडावान्ताको असर देखापरेको स्थानीय धनसरा सुनारले निशाना न्युजलाई जानकारी दिईन । यही असार १० गते डिभिजन वन कार्यालय पहलमानपुरले भजनी १ मा रहेका घर एक सय ७ घरधुरी डोजर लगाएर भत्काएको उनले वताइन् । वनले सूचना टाँस नगरी एक्कासी ४ वटा डोजरले वस्तीका १०७ घर भत्काई दिएको उनको भनाई छ ।

भजनी १ मा रहेको क्याम्पस टोलका ३७,मटखोदनीका १४,पिसियो टोलका ३८ र रेञ्जरपोष्टका १८ घर वनले भत्काएर बिचल्ली बनाएको उनले वताइन् । ‘वनले जमिन खालि गर्न ५ दिनको समय दिएको छ’, उनले भनिन् ‘ हामीले कहाँ गएर वस्ने हो राज्यले व्यवस्थापन गरिदिन अनुरोध गर्दछु । वर्षातको समय छ, पालमुनिको वासका कारण जरो आउने,टाउको,कम्मर दुख्ने,वाकवाकी लाग्ने जस्ता लक्षण देखा परेकोले म आफै ४ दिन अस्पताल वसेर आएकी हुँ ।’ ‘बस्ने बास छैन, पालमुनी वस्नु पर्ने अवस्था छ, सर्प किराको डर उत्तिकै छ’ उनले भनिन्– ‘यो अवस्थामा पनि कसैले हाम्रो व्यवस्थापन गर्न चासो देखाएको छैन् ।’

‘हाम्रो लागि केको सरकार ? हुनेखानेको लागि मात्र सरकार हो’ उनले दुःखेसो पोख्दै भनिन् । १८ वर्ष देखि उपभोग गर्दै आएको जमिनका घर भत्काएपछि सर्वसाधारणलाई उठीवास गरेको उनीहरुको गुनासो छ । अर्का पीडित धनसरा साउँदले बालबालिका बुढाबूढीलाई झाडावान्ताले सताइरहेको बताइन । उनले भनिन् ‘के खाने कहाँ बस्ने वनले हामीलाई बिचल्ली बनायो ।’ राज्यले सुकुम्बासीको उचित व्यवस्थापन गर्ने कुरा झुटा सावित भएको उनको भनाइ छ ।

पीडित पूजा नेपालीले बस्तीका मानिसको विचल्ली भएको बताइन् । ‘काम गरेर खानु पर्छ न बस्ने बास छ,न खाने गाँस छ,डोजरले सबै हाम्रा सपना चकनाचुर गरिदियो’ उनले दुखेसो गर्दै भनिन्– ‘किनेर ल्याएको धान,गहुँ सबै माटोमा मिसाइ दियो ।’

१८ वर्ष देखि भोगचलन गर्दै आएको जमिनका घर भत्काएपछि भजनी नगपालिकाले सुरक्षित आवासका लागि प्रदेश, संघ सरकारसँग समन्वय गरी दीर्घकालिन रुपमा व्यवस्थापनका लागि पहल गरिदिन भन्दै पीडितले नगर प्रमुख केवल चौधरी समक्ष ज्ञापनपत्र समेत बुझाएको छ । ज्ञापनपत्र बुझ्दै नगरप्रमुख चौधरीले पीडितहरुको पक्षमा काम गर्न अग्रसर भएर लाग्ने बताएका छन् । यस सम्बन्धमा डिभिजन वन कार्यालय पहलमानपुरका डिभिजन अधिकृत रामबिचारी ठाकुरसँग सम्पर्क गर्न खोज्दा उनले फोन उठाएनन् ।