काठमाडौं- प्रहरीले लागूऔषधसहित १४ जनालाई पक्राउ गरेको छ । सोमबार देशका विभिन्न ठाउँबाट लागूऔषधसहित उक्त व्यक्तिहरुलाई पक्राउ गरेको हो ।
काठमाडौंको तारकेश्वर नगरपालिका–२ मिलमिलाप टोलबाट अवैध लागूऔषध ब्राउनसुगर जस्तो देखिने पदार्थ ८ ग्राम ५ मिलिग्राम र नगद ७ हजार ४ सय रूपैयाँ सहित २ जनालाई प्रहरीले पक्राउ गरेको छ ।
पक्राउ पर्नेहरूमा तारकेश्वर नगरपालिकामा डेरा गरी बस्ने नुवाकोट ककनी गाउँपालिका–७ घर भएका ३० वर्षीय राकेश बलामी र नुवाकोट पञ्चकन्या गाउँपालिका–६ घर भएका २२ वर्षीय रोशन थापा रहेका छन् । प्रहरी वृत्त बालाजुबाट खटिएको प्रहरीले उनीहरूको कोठाबाट उक्त पदार्थ फेला पारी पक्राउ गरेको हो ।
कैलालीको टीकापुर नगरपालिका–९ खग्रौला चेक पोष्टबाट अवैध लागूऔषध खैरो हेरोइन जस्तो देखिने पदार्थ २ ग्राम सहित टीकापुर नगरपालिका–९ बस्ने २२ वर्षीय दिपेश आउजीलाई इलाका प्रहरी कार्यालय टिकापुरबाट खटिएको प्रहरीले उनलाई उक्त पदार्थ सहित पक्राउ गरेको हो । धनगढी उपमहानगरपालिका ६ चैतन्य पाठशालाबाट अवैध लागूऔषध खैरो हेरोइन जस्तो देखिने पदार्थ ६ सय ८० मिलिग्राम सहित ३ जनालाई गएराति प्रहरीले पक्राउ गरेको छ ।
पक्राउ पर्नेहरूमा सोही उपमहानगरपालिका–५ बस्ने वर्ष १८ वर्षीय किशोर, वडा नं. १ शिवनगर बस्ने १९ वर्षीय योगेन्द्र प्रसाद भट्ट र वडा नं. ८ क्याम्पस रोड बस्ने ३५ वर्षीय आयुष सिंह रहेका छन् । जिल्ला प्रहरी कार्यालय कैलालीबाट खटिएको प्रहरीले सुपप्र ०१००९ प ४८० नम्बरको स्कुटरमा सवार उनीहरूलाई उक्त पदार्थ सहित पक्राउ गरेको जनाइएको छ ।
सुर्खेतको पन्चपुरी नगरपालिका–५ स्थित गणेश शाहीको घरबाट अवैध लागूऔषध ब्राउनसुगर जस्तो देखिने पदार्थ ७ सय ७० मिलिग्राम र नगद २१ हजार ५ सय रूपैयाँ सहित ४ जनालाई सोमबार बेलुकी प्रहरीले पक्राउ गरेको छ । पक्राउ पर्नेहरूमा पन्चपुरी नगरपालिका–५ बाबियाचौर बस्ने ३८ वर्षीय प्रेम बहादुर शाही, ३५ वर्षीय तपेन्द्रकुमार कँडेल, ३२ वर्षीय तप्त रावल र सोही नगरपालिका–६ बस्ने ३८ वर्षीय प्रमोद बहादुर सलामी रहेका छन् । इलाका प्रहरी कार्यालय बाबियाचौरबाट खटिएको प्रहरीले उनीहरूलाई उक्त पदार्थ सहित पक्राउ गर्नुका साथै उनीहरूले प्रयोग गरेको भे ७ प ३०७ नम्बरको मोटरसाइकल समेत बरामद भएको प्रहरीले जनाएको छ।
बर्दियाको बढैयाताल गाउँपालिका–३ भोलागौडी चोकबाट अवैध लागूऔषध ब्राउनसुगर जस्तो देखिने पदार्थ ४ सय १० मिलिग्राम सहित बर्दिया बाँसगढी नगरपालिका–६ दमौली बस्ने २० वर्षीय मनिश शाह समेत २ जनालाई गएराति प्रहरीले पक्राउ गरेको छ । इलाका प्रहरी कार्यालय मैनापोखरबाट खटिएको प्रहरीले भे ६ प ७०५ नम्बरको मोटरसाइकलमा सवार उनीहरूलाई उक्त पदार्थ सहित पक्राउ गरेको हो ।
त्यस्तै,बाँकेको बैजानाथ गाउँपालिका–१ गावर लाईन्स पार्कस्थित सडकबाट अवैध लागूऔषध ब्राउनसुगर जस्तो देखिने पदार्थ १ ग्राम ५ सय मिलिग्राम सहित बैजानाथ गाउँपालिका–१ बस्ने ३१ वर्षीय सुकबहादुर रावल र २९ वर्षीय नगेन्द्र रोकायलाई सोमबार राति प्रहरीले पक्राउ गरेको छ । इलाका प्रहरी कार्यालय चिसापानीबाट खटिएको प्रहरीले उनीहरूलाई उक्त पदार्थ सहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको जनाइएको छ ।
