धनगढी– डेंगुरोग नियन्त्रण तथा रोकथाम सम्बन्धी पत्रकारहरुसंग अन्तरक्रिया कार्यक्रम सम्पन्न भएको छ । धनगढीमा शनिबार स्वास्थ्य कार्यालय कैलालीको आयोजनामा डेंगु नियन्त्रण तथा रोकथाम सम्बन्धी अन्तरक्रिया कार्यक्रम भएको हो ।कार्यक्रममा स्वास्थ्य कार्यालय कैलालीका कार्यालय प्रमुख लालबहादुर धामीले डेंगुसम्बन्धी प्रतिवेदन प्रस्तुत गरेका थिए ।
प्रतिवेदन प्रस्तुत गर्दै स्वास्थ्य कार्यालय कैलालीका कार्यालय प्रमुख धामीले कैलालीमा हालसम्म डेंगुबाट दुई जनाको मृत्यु भएको बताए । डेंगु रोग सार्ने लामखुट्टेले बिहान, दिउँसो र साँझ बढी टोक्ने भएकाले घर वरिपरिको वातावरणको सरसफाइमा ध्यान दिनुपर्ने बताए ।
जुनसुकै व्यक्तिलाई पनि डेंगु हुनसक्ने भन्दै उनले यसबाट बच्चका लागि घर वरिपरिको वातावरण सरसफाइ राख्नुका साथै राति सुत्दाखेरी झुलको प्रयोग गर्नुपर्ने सुझाव दिए । हप्तादिन सम्म राखेको पानीमा डेंगु हुन सक्ने उनले बताए । डेंगु नियन्त्रण गर्न स्वास्थ्य कार्यालयले जनचेतना मुलक कार्यक्रमहरु गर्दै आएको उनले बताए ।
कार्यक्रममा धनगढीका विभिन्न मिडियामा कार्यरत पत्रकारहरुको सहभागिता रहेको थियो । कार्यक्रमको सञ्चालन स्वास्थ्य कार्यालय कैलालीमा कार्यरत स्वास्थ्य अधिकृत मिनबहादुर धामीले गरेका थिए ।
