पाल्पा। मगर भाषा पढाई प्रवाहका लागि ३ दिने शिक्षकहरुको तालिम तानसेन नगरपालिका ९ तिनतिआँपमा सम्पन्न भएको छ । नेपाल मगर संघ माथागढी गाउँ कार्यसमिती पाल्पाको आयोजना तथा हिमाली आदिवासी समाज नेपालको सहयोगमा भएको तालिम आज सम्पन्न भएको हो ।
नेपाल मगर संघ माथागढीका अध्यक्ष भेगराज थापामगरको सभाध्यक्षतामा भएको तालिम समापन कार्यक्रमका प्रमुख अतिथी माथागढी गाउँपालिका वडा नं। ३ का वडा अध्यक्ष तेज बहादुर घर्ति मगर रहेका थिए । कार्यक्रममा बोल्दै प्रमुख अतिथी घर्ति मगरले मगर समुदायको बासोबास देशका ७७ वटै जिल्लामा रहेको छ । जसमा पनि पाल्पा जिल्लामा प्रमुख बासोबास रहेको बताउँदै उनले भाषा, संस्कृति र पहिचानको दृष्टिकोणले पनि मगर समुदाय धनि भएको बताए । तर पछिल्लो समय मगर समुदायको संस्कृति र संस्कारहरुमा पुस्तान्तरणको अभाव देखिएको छ । यस्तो परिस्थितीमा भाषालाई अझ ब्यवस्थित गरि लिपिबद्ध गराउँदै पुस्ता पुस्तान्तरण गराउन आवश्यक रहेको उनले बताए ।
यस्तै कार्यक्रमका बिशिष्ट अतिथी हिमाली आदिवासी समाज नेपालका कार्यक्रम संयोजक टेसी टेमा भोटेले पढाई प्रवाह परियोजना अन्तरगत पाल्पाको माथागढी गाउँपालिकामा बासोबास गर्ने मगर समुदायलाई लक्षित गरि कार्यक्रम आयोजना गरिएको बताए । यसले मगर भाषा जगेर्नाका साथै मातृभाषा निरन्तर पढ्न र लेख्न प्रेरित गराउने विश्वास लिइएको उनको तर्क छ ।
तालिममा १ महिने मगर भाषा सरासर पढ्ने, लेख्ने कक्षा संचालन हुने माथागढी गाउँपालिकाका १४ वटा गाउँ रटोलका शिक्षक शिक्षिकाहरुको सहभागिता रहेको थियो । उक्त तालिमको सहजिकरण हिमाली आदिवासी समाज नेपालका टेसी डेमा भोटे र टिआर कठरियाले गरेका थिए ।
