धनगढी । नेकपा एमालेका नेता तथा कैलाली जिल्ला इन्चार्ज नारदमुनि रानाले सुदूरपश्चिम प्रदेशको उद्योग, वन तथा वातावरण मन्त्रालयमा भएको आर्थिक चलखेलमा आफ्नो नाम जोडिएकोप्रति गम्भिर आपत्ति प्रकट गरेका छन् ।
मंगलबार धनगढीमा आयोजित पत्रकार सम्मेलनमा उनले आफू निर्दोष रहेको दाबी गर्दै अडियोमा आफ्नो नाम गलत रूपमा प्रयोग गरिएको दाबी गरे ।
पत्रकार सम्मेलनमा बोल्दै उनले मन्त्री चौधरीसँगको भेटका क्रममा भएको कुराकानीको अडियो सार्वजनिक भएपछि विभिन्न सञ्चारमाध्यमले आफ्नो फोटो राखी समाचार प्रकाशित गरेको आफ्नो गम्भिर आपत्ति भएको जनाए ।
चौधरीले आफूलाई फोन गरी ‘दाजु, म तपाईँजस्तै मन्त्री भएको छु । चिया खाऔँ र सरसल्लाह गरौँ,’ भन्ने प्रस्ताव राखेको उनले बताए । उक्त प्रस्तावपछि मन्त्रीको कार्यकक्षमा आफू पुगेको उनले बताए । मन्त्रीको सचिवालयमा केही व्यक्ति पनि रहेको उनले बताए ।
दीगो वन व्यवस्थापन कार्यविधिका लागि मन्त्रीज्यूले काम गर्न गाह्रो भएको बताएपछि मैले दुई सुझाव दिएको बताउँदै उनले पहिलो, कार्यदल बनाएर कार्यविधि तयार गर्नुहोस् । दोस्रो, लुम्बिनी प्रदेशको कार्यविधिलाई आधार मानेर आवश्यक परिमार्जन गर्नुहोस् भन्ने सुझाव मात्र दिएको बताए ।
रानाले अडियोमा भएका अरू कुराहरू आफू अघि नभएको र कसैले अडियोमा अन्य संवादहरू जोडेको दाबी गरे । उनले अडियो तोडमोड गरेर प्रस्तुत गरेको दाबी गर्दै आर्थिक चलखेलको कुरा मसँग कुनै पनि सम्बन्ध छैन भने ।
उनले मन्त्रालयकै केही व्यक्तिले अडियो रेकर्ड गरी सार्वजनिक गरेको हुनसक्ने शंका व्यक्त गर्दै मन्त्रालयलाई सफल बनाउन सकारात्मक सुझाव मात्रै दिएको र आर्थिक चलखेलमा आफ्नो कुनै संलग्नता नरहेको बताए ।
