धनगढी- कैलालीमा मुख्य निर्वाचन अधिकृतको कार्यालय स्थापना गरिएको छ । बिहीबार धनगढीमा एक कार्यक्रमका बिच निर्वाचन आयुक्त डा।जानकी तुलाधरले कैलालीको मुख्य निर्वाचन अधिकृतको कार्यालय उद्घाटन गरेकी हुन् । उद्घाटन गर्दै आयुक्त तुलाधरले निर्वाचन लाई मर्यादित, निष्पक्ष र भयरहित वातावरण सम्पन गर्न सबै निकाय जिम्मेवारीका साथ लाग्नु पर्नेमा जोड दिएकी हुन् । उनले स्थानीय तहको निर्वाचनमा कैलालीमा ७० प्रतिशत भन्दा बढी मत खसेको हुँदा अब त्यो भन्दा बढी जनताको सहभागिता गराउन सबैले मेहनत गनुपर्ने धारणा राखिन् । उनले निर्वाचनमा जनसहभागिता सँगै निष्पक्ष, भयरहित र मर्यादित बनाउन आवश्यक रहेको बताइन ।

उनले निर्वाचनमा ३ गते सम्म १८ वर्ष पुगेका नागरिकले मतदान गर्ने पाउने पनि जानकारी दिइन । मङ्सिर ४ गते हुने निर्वाचनका लागी राज्यका सबै निकाय जिम्मेवार पूर्ण रूपले लागेका कारण कैलालीमा हुने निर्वाचन स्वच्छ र निष्पक्ष रुपम सम्पन हुने विश्वास कैलालीमा मुख्य निर्वाचन अधिकृत ओमप्रसाद अर्यालले बताए । कैलाली स्थानीय तहको निर्वाचन सहज वातावरणमा सम्पन्न भएझैँ यो निर्वाचन पनि स्वच्छ तरिकाले सम्पन्न गर्ने उनको दाबी छ । स्थानीय तह भन्दा केही प्रतिशत भएपनि राम्रो तरिकाले प्रदेश र सङ्घको निर्वाचन सम्पन्न गर्ने उनको भनाई छ । कैलालीमा प्रदेश र प्रतिनिधि सभाको निर्वाचनका लागी ५ लाख ३५ हजार ५ सय १४ मतदाताले सहभागिता जनाउने छन् ।

कैलालीका ५ निर्वाचन क्षेत्रका लागी २ सय ३७ मतदान स्थल र ६ सय २९ मतदान केन्द्र कायम गरिएको छ । निर्वाचन अधिकृत र मुख्य निर्वाचन अधिकृतको कार्यालय स्थापना सँगै निर्वाचन लक्षित कार्यक्रम निरन्तर अघि बढ्ने प्रदेश निर्वाचन कार्यालय कैलालीका प्रमुख प्रेमराज भट्टले बताए । निर्वाचन अधिकृतको कार्यालय स्थापनासंगै राजनीतिक दलहरूलाई आचारसंहिता बारे जानकारी दिने, मतदान अधिकृत छनौट, तालिम, मतदान तथा मतगणनामा सहभागी कर्मचारीहरूलाई तालिम दिने लगायतका काम निर्वाचन आयोगले थाल्ने बताएको छ ।