धनगढी । नेकपा माओवादी केन्द्रका केन्द्रीय सदस्य एवं पूर्वमन्त्री रमेशसिंह धामीले ठूलो त्याग र बलिदानबाट जारी संविधान मास्ने षड्यन्त्र भइरहेको बताएका छन् ।
आज संविधान दिवस २०८२ को अवसरमा पार्टीको धनगढी उपमहानगर कमिटीले आयोजना गरेको दीप प्रज्वलन कार्यक्रममा बोल्दै उनले यस्तो बताएका हुन् ।
उनले भने ‘विभिन्न जालझेल र षड्यन्त्रका बीच संघीय लोकतान्त्रिक गणतन्त्रको संविधान जारी गर्न सफल भएक थियौं । त्यो जालझेल आज पनि जारी छ ।’
त्यस्तै उनले संविधान जारी गर्ने नेतृत्वमाथि पनि हमला भइरहेको बताए ।
उनले भने ‘माओवादी केन्द्रका अध्यक्ष पुष्पकमल दाहाल प्रचण्ड यो देशको नेतृत्वमा नभएको भए २०७२ को संविधान जारी हुने थिएन । आज संविधान र संविधान जारी गर्ने नेतृत्वमाथि हमला भइरहेको छ ।’
त्यस्तै उनले कांग्रेस एमालेको दुईतिहाइको दम्बी,झेली र जिद्दी सरकारका कारण देशमा यस्तो अवस्था आएको बताए ।
उनले जेनजीले उठाएका भ्रष्टाचार अन्त्य,सुशासन कायम गर्नुपर्ने,कार्यकारी सरकार प्रमुख बनाउनु पर्ने माग जायज र माओवादी केन्द्रका एजेन्डासँग मिल्ने भएको बताए ।
तर, जेनजीले राखेका जायज मागको वेवास्ता गरेर सरकारले दमन गर्दा अहिलेको परिस्थिति आएको उनले बताए ।
उनले १० वर्षे जनयुद्ध,विभिन्न आन्दोलन तथा भर्खरै जेनजी आन्दोलनमा ज्यान गुमाउने सहिदप्रति श्रद्धाञ्जली समेत अर्पण गरे ।
