धनगढी । कैलालीमा लागुऔषधसहित दुई जना पक्राउ परेका छन्।
जिल्लाको टीकापुर नगरपालिका–७ सत्ती बजार क्षेत्रमा पैदल हिँडिरहेका पदमपुर बस्ने ३० वर्षीय हिक्मत ठकुल्लालाई प्रहरीले चेकजाँच गर्दा उनको साथबाट ७३० मिलिग्राम लागुऔषध खैरो हेरोइन जस्तो देखिने धुलो पदार्थ फेला पारी इलाका प्रहरी कार्यालय टिकापुरबाट खटिएको प्रहरी टोलीले उनलाई नियन्त्रणमा लिएको जनाइएको छ।
यस्तै, गोप्य सूचनाको आधारमा लम्कीचुहा नगरपालिका–६ बाकमाराबाट स्थानीय २५ वर्षीय गोबिन्द घर्तीमगरलाई प्रहरीले नियन्त्रणमा लिएको छ। पैदल हिँडिरहेका उनलाई शंका लागि चेकजाँच गर्दा उनको साथबाट ५४० मिलिग्राम लागुऔषध खैरो हेरोइन जस्तो देखिने धुलो पदार्थ बरामद भएको प्रहरीले जनाएको छ। उनीहरू दुवैलाई आवश्यक अनुसन्धान तथा कारबाहीका लागि प्रहरीले नियन्त्रणमा राखेको र थप अनुसन्धान भइरहेको सुदूरपश्चिम प्रदेश प्रहरी कार्यालय धनगढीले जनाएको छ ।
