धनगढी । कैलालीको धनगढी उपमहानगरपालिकाको विशेषज्ञ वडा स्वास्थ्य क्लिनिक प्रभावकारी बन्दै गएको छ । उपमहानगरले विपन्न नागरिकका लागि लक्षित गर्दै सञ्चालनमा ल्याएको सो कार्यक्रम प्रभावकारी बन्दै गएको हो ।
आर्थिक अभावका कारण उपचार गर्न नसक्ने गरिब तथा विपन्न नागरिकलाई घरदैलोमै निःशुल्क विशेषज्ञ स्वास्थ्य सेवा दिने उद्देश्यले सञ्चालनमा ल्याइएको उक्त कार्यक्रम प्रत्येक महिना १९ वटै वडामा सञ्चालन हुँदै आएको छ ।
सोही कार्यक्रम अनुसार आज धनगढी उपमहानगरपालिका–१३ स्थित सहरी स्वास्थ्य केन्द्रमा सञ्चालित विशेषज्ञ वडा स्वास्थ्य क्लिनिकमा २ सय ४९ जनाले सेवा लिएको स्वास्थ्य केन्द्र प्रमुख पूर्णानन्द जोशीले जानकारी दिए ।
उनका अनुसार ३५ पुरुष र २ सय १४ महिलाले सेवा लिएका छन् । जसमध्ये ५० महिलाले गर्भवति सेवा,३० जनाले प्रयोगशाला,२७ जनाले भिडियो एक्सरे, ९ जनाले ईसिजी र ७८ जनाले आँखासम्बन्धि रोगको सेवा लिएको उनले जानकारी दिए ।
क्लिनिकमा बिरामीको निःशुल्क जाँचका साथै औषधि पनि निःशुल्क दिने गरिएको उनले बताए ।
पछिल्लो समय वडा स्वास्थ्य क्लिनिकमा बिरामीको आकर्षण बढ्दै गएको विशेषज्ञ वडा स्वास्थ्य क्लिनिकका कन्सल्टेन्ट फिजिसियन डा. विकास रिजालले बताए ।
उनले भने ‘पहिले पहिले नागरिकलाई वडा स्वास्थ्य क्लिनिको बारेमा थाहा थिएन् । अहिले सबैले बुझिसकेका छन् । बिरामीहरु खोज्दै आफै आउने गरेका छन । बिरामीको संख्या पनि बढ्दै गएको छ ।’
उनले क्लिनिकमा सर्ने,नसर्ने सबै रोगको उपचार सेवा रहेको बताए । उनले पछिल्लो समयमा नसर्ने रोगको प्रकोप बढेको बताउँदै प्रेसर,सुगर,दम थाइराइडजस्ता रोगका बिरामी बढी आउने गरेको बताए ।
क्लिनिकमा निःशुल्क इसिजी सेवा पनि रहेको बताए । उपचार सम्भव भएकालाई क्लिनिकमै उपचार गरिने र सम्भव नभएकालाई अन्यन्त्र रिफर गर्ने गरिएको उनले बताए ।
२०७९ को निर्वाचनमा नगरप्रमुखमा गोपाल हमाल निर्वाचित भएपछि उनले २०७९ को साउनबाट यो कार्यक्रम लागु गरेका थिए । यसबाट विपन्न नागरिकले निःशुल्क विशेषज्ञ स्वास्थ्य सेवा पाएका छन् ।
