धनगढी । आसन्न प्रतिनिधिसभा सदस्य निर्वाचनका लागि नेपाली कम्युनिस्ट पार्टीका तर्फबाट कैलाली क्षेत्र नं. ५ का उम्मेदवार एवं पूर्वमन्त्री प्रेमबहादुर आलेले आफ्नो जित सुनिश्चित रहेको दाबी गरेका छन् ।
आज धनगढी उपमहानगरपालिका-१८ मा आयोजित युवा मतदाता शिक्षा अभिमुखीकरण कार्यक्रममा बोल्दै उनले यस्तो दाबी गरेका हुन ।
कार्यक्रममा बोल्दै उनले घरदैलो अभियानका क्रममा जनताबाट अपार माया र समर्थन प्राप्त भइरहेको बताए ।
“अहिलेको विषम राजनीतिक तथा आर्थिक परिस्थितिमा नेकपालाई जिताउन आवश्यक छ,” उनले भने, “जनताको विश्वास र समर्थनले मेरो जित सुनिश्चित छ ।”
आफूले विगतमा विकासका विभिन्न कामहरू गरेको उल्लेख गर्दै जनतासँगको सुमधुर सम्बन्धका कारण डोटीबाट लगातार तीन पटक निर्वाचन जितेको बताए ।
कैलाली क्षेत्र नं. ५ का मतदाताबाट पनि आफूले साथ र समर्थन पाउनेमा विश्वस्त रहेको उनले बताए ।
आलेले निर्वाचित भएपछि कैलाली क्षेत्र नं ५ को समग्र विकास, शिक्षा, स्वास्थ्य तथा रोजगारी सिर्जनालाई प्राथमिकतामा राखेर काम गर्ने स्पष्ट पारे ।
कार्यक्रममा स्थानीय युवाहरू,पार्टी कार्यकर्ता तथा सर्वसाधारणको बाक्लो उपस्थिति रहेको थियो।
