धनगढी । कैलाली क्षेत्र नम्बर ५ का प्रतिनिधि सभा सदस्य उम्मेदवार नर नारायण शाह ‘मनु’ ले आफ्ना कार्यकर्तालाई अन्य उम्मेदवारका विषयमा नकारात्मक टिप्पणी नगर्न स्पष्ट निर्देशन दिएका छन् । आसन्न निर्वाचनलाई लक्षित गर्दै आयोजित घरदैलो चुनावी कार्यक्रम र आन्तरिक बैठकमा बोल्दै उनले चुनावी प्रतिस्पर्धा मर्यादित, सभ्य र सकारात्मक हुनुपर्नेमा जोड दिएका हुन् ।
उम्मेदवार मनुले निर्वाचन लोकतान्त्रिक अभ्यासको महत्वपूर्ण माध्यम भएकाले यसलाई स्वस्थ र अनुशासित बनाउन सबै कार्यकर्ताले जिम्मेवार भूमिका निर्वाह गर्नुपर्ने बताएका थिए । उनले सामाजिक सञ्जाल, सार्वजनिक सभा, घरदैलो कार्यक्रम तथा भेटघाटका क्रममा कुनै पनि उम्मेदवारको व्यक्तिगत जीवन, चरित्र वा निजी विषयमा टिप्पणी नगर्न आग्रह गरेका छन् । उनले निर्वाचन अभियानलाई मुद्दामुखी बनाउनुपर्नेमा जोड दिँदै आफ्नो एजेन्डा, योजना र विकासका प्रतिबद्धताहरू जनतामाझ स्पष्ट रूपमा प्रस्तुत गर्न कार्यकर्तालाई सुझाव दिएका छन् । मतदातालाई भ्रमित पार्ने, अपुष्ट आरोप लगाउने वा उत्तेजना फैलाउने गतिविधिबाट टाढा रहन उनले निर्देशन दिएका हुन् ।
मनुले सकारात्मक सोच र व्यवहारले मात्रै जनताको विश्वास जित्न सकिने उल्लेख गर्दै सम्मानजनक राजनीतिक संस्कार स्थापित गर्न सबैलाई जिम्मेवार बन्न आग्रह गरेका छन् । उनले प्रतिस्पर्धी उम्मेदवारप्रति सम्मान कायम राख्दै आफ्नो कार्यक्रम र योजनाको आधारमा मत माग्न कार्यकर्तालाई निर्देशन दिएका छन् ।
उनका अनुसार स्वस्थ र निष्पक्ष प्रतिस्पर्धाले मात्रै लोकतान्त्रिक मूल्य–मान्यतालाई मजबुत बनाउने विश्वास व्यक्त गरिएको छ । चुनाव केवल जित–हारको विषय मात्र नभई जनताको सेवा गर्ने अवसर भएकाले सभ्य र शालीन व्यवहार प्रदर्शन गर्नुपर्ने उनले बताए ।
मनुले चुनावी अभियानलाई सिर्जनात्मक, सकारात्मक र जनमुखी बनाउन सबै कार्यकर्तालाई एकताबद्ध भएर लाग्न आह्वान गरेका छन् । उनले कैलाली क्षेत्र नम्बर ५ को विकास र समृद्धिका लागि स्पष्ट योजना र प्रतिबद्धता सहित आफू मतदातामाझ पुगेको उल्लेख गर्दै सकारात्मक अभियानले राम्रो सन्देश जाने विश्वास व्यक्त गरेका छन् ।
