चन्दले प्रमाणपत्र ग्रहण गरेलगत्तै फाप्लाको भ्रमण गर्दै आवश्यक कागजी प्रक्रियाहरु पूरा भइसकेको अवस्थामा अब बन्ने रास्वपा सरकारले पूर्वाधार निर्माणलाई मुर्तरुप दिन बजेट सुनिश्चितताको प्रतिबद्धता गरे ।
‘फाप्लाका विषयमा मैले पहिलेदेखि नै अध्ययन गरेको छु । मेरो चुनावी एजेन्डामा पनि यो परियोजना परेको छ,’ चन्दले भ्रमणका क्रममा भने, ‘सदूरपश्चिम क्रिकेट उत्पादन गर्ने फ्याक्ट्री हो । फ्याक्ट्रीलाई जोगाउन मेरो पूर्ण सहयोग रहन्छ । खेल समाजलाई एकताबद्ध गराएर लैजाने माध्यम भएकाले पनि यस परियोजनालाई मुर्तरुप दिन आवश्यक बजेट विनियोजनको पहलका लागि मेरो प्रतिबद्धता र प्राथमिकतामा रहन्छ ।’
नवनिर्वाचित चन्दलाई मैदानमा फाप्ला अन्तर्राष्ट्रिय क्रिकेट रंगशाला तथा खेलग्राम पूर्वाधार विकास समितिका अध्यक्ष सुवाश शाहीले स्वागत गरेका थिए । निर्वाचित चन्दलाई बधाई दिदैँ शाहीले सुदूरपश्चिमको मुहार फेर्ने (गेम चेन्चर) यस परियोजना अब थप द्रुत गतिमा अघि बढ्ने अपेक्षा व्यक्त गरे ।
‘यसअघिका सरकारहरुले पनि प्राथमिकतामा राखेको फाप्लाको जग्गा प्राप्ति, डीपीआर निर्माण तथा वातावरणीय प्रभाव मूल्यांकन (इआईए) लगायतका महत्वपूर्ण काम सम्पन्न भइसकेका छन्,’ शाहीले भने, ‘यसपटक स्थिर सरकार बन्ने निश्चित भएकाले फाप्लाको कामले थप गति लिने विश्वास व्यक्त गरेको छु ।’
शनिबार दिउँसो सम्पन्न मतगणना अनुसार चन्द ३१ हजार ९ सय ५३ मत विजयी भएका हुन् । चन्दको चुनावी घोषणापत्रमा पनि फाप्ला निर्माणलाई प्राथमिकता दिने उल्लेख छ ।
