कैलाली । नवजीवन सहकारी संस्था लिमिटेडको आगामी निर्वाचनलाई लक्षित गर्दै केशव राज मिश्र नेतृत्वको समूहले प्यानल घोषणा गरेको छ ।

पत्रकार सम्मेलन मार्फत केशव राज मिश्र नेतृत्वको समूहले प्यानल संगै १६ बुँदे प्रतिबद्धतापत्र  सार्वजनिक गर्दै सहकारीलाई देशकै नमूना बनाउने दृढ संकल्प व्यक्त गरेको छ ।
अध्यक्ष पदका उम्मेदवार केशव राज मिश्रले भने, “पछिल्लो समय सहकारी क्षेत्रमा देखिएका समस्या र चुनौतीलाई रोक्न योग्य, सक्षम र स्वच्छ छविको नेतृत्व आवश्यक छ ।

नवजीवनलाई नयाँ र नमूना सहकारी बनाउने अभियानमा हामी पूर्ण रूपमा प्रतिबद्ध छौं ।”
समूहले नवजीवनलाई देशकै उत्कृष्ट सहकारीमध्ये एक बनाएको दाबी गर्दै सदस्यहरूलाई सक्षम नेतृत्वका लागि आफ्नो टिमलाई भोट दिन अपिल गरेको छ । २३औँ वार्षिक साधारणसभा तथा निर्वाचनलाई लक्षित गर्दै सार्वजनिक गरिएको १६ बुँदे प्रतिबद्धता निकै आकर्षक र व्यावहारिक छन् ।
प्रतिबद्धतापत्रका प्रमुख बुँदाहरू
सहकारी सदस्यहरूमा शिक्षा र सचेतना अभिवृद्धि कार्यक्रम सञ्चालन
खराब कर्जाको पूर्ण फर्स्योटका लागि विशेष समिति गठन
सहकारीबाट सम्पत्ति खरिद प्रक्रियाको पूर्ण समीक्षा र पारदर्शिता
‘एक घर, एक सदस्य’ नीति कडाइका साथ लागू
निर्वाचन लक्षित होइन, सक्रिय र नियमित सदस्यलाई प्राथमिकता
कर्मचारी भर्ना र तहवृद्धिलाई पूर्ण पारदर्शी बनाउने
सेवाग्राहीसँग नम्र, व्यावसायिक र छिटो सेवा
शेयर सदस्यहरूलाई उत्पादनसँग जोडी नमूना नवजीवन निर्माण
हरेक कार्यालयमा सहकारी सहजकर्तासहित हेल्प डेस्क स्थापना
उपचार खर्च वृद्धि र स्वास्थ्य बीमा सुविधा विस्तार
मल, बीउ तथा कृषि सामग्रीमा सहकारी सदस्यलाई सहज र सस्तो व्यवस्था
समूहले सहकारीलाई केवल ऋण दिने र बचत लिने संस्थामात्र नभई सदस्यको जीवनस्तर उकास्ने, उत्पादनसँग जोड्ने र नमूना संस्थाको रूपमा विकास गर्ने स्पष्ट भिजन प्रस्तुत गरेको छ । के अब नवजीवन सहकारीले साँच्चै ‘नयाँ अध्याय’ लेख्न सक्छ ? सदस्यहरूको मतले यो प्रश्नको उत्तर दिनेछ । निर्वाचन नजिकिँदै गर्दा यो प्यानलले सहकारी आन्दोलनमा नयाँ बहस र आशा जगाएको छ ।