धनगढी । लम्कीचुहा प्रादेशिक अस्पतालको सञ्चालन तथा व्यवस्थापन विवाद झन् चर्किएको छ।
सुदूरपश्चिम प्रदेश सरकारको सामाजिक विकास मन्त्रालयले अस्पताल अनुगमनमा पुगेका आफ्ना कर्मचारीमाथि दुर्व्यवहार भएको भन्दै कडा आपत्ति जनाएको छ।
मन्त्रालयले शुक्रबार जारी गरेको प्रेस विज्ञप्तिमा अस्पतालको वास्तविक अवस्था बुझ्न खटिएको टोलीमाथि केही व्यक्तिले असहयोगपूर्ण र अनुचित व्यवहार गरेको उल्लेख गर्दै यस्तो गतिविधिले स्वास्थ्य सेवाजस्तो संवेदनशील क्षेत्रलाई प्रभावित पार्ने चेतावनी दिएको छ।
विज्ञप्तिमा “अस्पताल केवल संस्था नभई नागरिकको जीवन र आशासँग जोडिएको संवेदनशील ठाउँ हो” भन्दै विवाद र टकरावभन्दा संवाद र सहकार्यबाट समाधान खोज्न सबै पक्षलाई आग्रह गरिएको छ।
सामाजिक सञ्जाल र सञ्चार माध्यममा अस्पतालबारे भइरहेका टिप्पणी र आरोपप्रति समेत मन्त्रालयले गम्भीर चासो व्यक्त गरेको छ। मन्त्रालयले प्रचलित कानुनअनुसार अस्पतालको आर्थिक, भौतिक तथा जनशक्ति व्यवस्थापन गर्न आफू प्रतिबद्ध रहेको स्पष्ट पारेको छ।
प्रदेश सरकारले अस्पताल सञ्चालनका लागि मेडिकल सुपरिटेन्डेन्ट, लेखा अधिकृत तथा प्रशासनिक अधिकृतसहित कर्मचारी खटाइसकेको उल्लेख गर्दै सेवा प्रवाह सहज र प्रभावकारी बनाइने जनाएको छ।
मन्त्रालयले अन्त्यमा स्वास्थ्य सेवा अवरुद्ध हुने खालका गतिविधि नगर्न चेतावनी दिँदै समस्या समाधानका लागि सबै पक्ष जिम्मेवार बन्नुपर्ने बताएको छ।
