धनगढी । कैलालीको अत्तरिया चोकमा सुदूरपश्चिम प्रदेशकै पहिलो आकाशे पुल निर्माण कार्य सुरु गरिएको छ।
शनिबार गोदावरी नगरपालिकाका नगर प्रमुख विरेन्द्र भट्टले पुलको सिलान्यास गरेका हुन्।
सिलान्यास कार्यक्रममा बोल्दै नगर प्रमुख भट्टले अत्तरिया क्षेत्रमा दिनप्रतिदिन बढ्दै गएको सवारी चाप, पैदलयात्रीको जोखिम तथा सहज आवागमनलाई मध्यनजर गर्दै आकाशे पुल निर्माणको योजना अघि बढाइएको बताए।
उनले अत्तरिया बजार क्षेत्र तीव्र शहरीकरणतर्फ उन्मुख भएकाले आधुनिक तथा सुरक्षित पूर्वाधारको आवश्यकता बढ्दै गएको उल्लेख गरे।
उनले सडक पार गर्ने क्रममा हुने दुर्घटनाको जोखिम न्यूनीकरण गर्नुका साथै नागरिकको सुरक्षालाई प्राथमिकतामा राख्दै पुल निर्माण गर्न लागिएको बताए ।
गोदावरी नगरपालिकाको आन्तरिक स्रोतबाट निर्माण हुन लागेको उक्त आकाशे पुलको कुल लागत भ्याटसहित १ करोड ४२ लाख ८५ हजार ४ सय ९८ रुपैयाँ रहेको छ। निर्माणको जिम्मा कृजल त्रिनेत्र सिद्धनाथ जेभीले पाएको छ।
निर्माण कम्पनीका इन्जिनियर मोहित चन्दका अनुसार सुरुमा २०८२ फागुन १० गतेभित्र निर्माण सम्पन्न गर्ने लक्ष्य राखिएको थियो।
तर, सडक डिभिजन कार्यालयबाट अनुमति प्राप्त गर्न ढिलाइ हुँदा निर्माण प्रक्रिया प्रभावित भएको उनले बताए। अब संशोधित सम्झौताअनुसार पुल निर्माण कार्य २०८३ पुस मसान्तसम्म सम्पन्न गरिने जनाइएको छ।
